چیئرمین پاکستان تحریکِ انصاف (پی ٹی آئی) بیرسٹر گوہر علی خان نے کہا ہے کہ وزیرِاعظم شہباز شریف اور اسپیکر قومی اسمبلی سردار ایاز صادق کے خلاف تحریک عدم اعتماد لانے کی خبروں میں کوئی صداقت نہیں۔
صحافیوں سے گفتگو کرتے ہوئے بیرسٹر گوہر کا کہنا تھا کہ پاکستان تحریکِ انصاف کا ابھی کسی کے خلاف تحریک عدم اعتماد لانے کا کوئی ارادہ نہیں، مجھے بانی پی ٹی آئی عمران خان سے بھی اس حوالے سے کوئی ہدایات نہیں دی گئیں۔
انہوں نے واضح کیا کہ میڈیا پر چلنے والی تمام خبریں بے بنیاد ہیں، سردار ایاز صادق اور شہباز شریف کے خلاف تحریک عدم اعتماد لانے کی خبروں میں کوئی صداقت بھی نہیں ہے۔
واضح رہے کہ اس سے قبل نجی نشریاتی ادارے ‘جیو نیوز’ نے یہ خبر دی تھی کہ پاکستان تحریک انصاف نے قومی اسمبلی میں اپوزیشن اتحاد کے ساتھ مل کر وزیر اعظم شہباز شریف اور اسپیکر قومی اسمبلی سردار ایاز صادق کے خلاف تحریک عدم اعتماد لانے پر غور شروع کر دیا ہے۔
بانی پی ٹی آئی سے وکلا اور ان کی بہنوں نے ملاقات میں اسپیکر قومی اسمبلی کے خلاف عدم اعتماد کی بات کی، اس موقع پر عمران خان کو اپوزیشن اتحاد اور محمود خان اچکزئی کے اسپیکر کے خلاف عدم اعتماد کے مؤقف سے آگاہ کیا گیا۔
نجی نشریاتی ادارے نے ذرائع کا حوالہ دیتے ہوئے بتایا کہ عمران خان نے ملاقات میں اسپیکر قومی اسمبلی کے خلاف عدم اعتماد کے معاملے کو آگے بڑھانے کا پلان بنانے کا حکم دیا، بانی چیئرمین پی ٹی آئی نے تحریک انصاف کی قیادت اور اپوزیشن اتحاد کو فیصلے پر عملدرآمد کا اختیار دیا، عمران خان نے کہا موجودہ حکومت کو پارلیمنٹ کے باہر اور اندر ٹف ٹائم دیں۔
مزید پڑھیں: وزیر خارجہ اسحاق ڈار کا چینی ہم منصب کی دعوت پر بیجنگ کا تین روزہ دورہ، ’علاقائی صورتحال‘ پر بات ہوگی
دوسری جانب پی ٹی آئی رہنما اسد قیصر نے کہا ہے کہ اسپیکر اور وزیراعظم دونوں کے خلاف عدم اعتماد کا سوچ رہے ہیں، پاکستان-انڈیا کشیدگی کی وجہ سے عدم اعتماد کا معاملہ وقتی طور پر روکا ہے، اگر عدم اعتماد لائیں تو سمجھا جائے گا کہ جنگ میں بھی سیاست کر رہے ہیں۔
ان کا کہنا تھا کہ اب ایاز صادق اور وزیراعظم کے خلاف تحریک عدم اعتماد کا آپشن زیرغور ہے، اسپیکر اور وزیراعظم کے خلاف تحریک عدم اعتماد کا آپشن وقت پر استعمال کریں گے۔
