پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے شمالی وزیرستان کے علاقے میران شاہ کا دورہ کیا، جہاں پہنچنے پر پشاور کور کے کمانڈر نے ان کا استقبال کیا۔ دورے کے دوران انہیں علاقے کی مجموعی سیکیورٹی صورتحال، انٹیلیجنس معلومات کی بنیاد پر جاری کارروائیوں اور امن و امان کی بہتری کے لیے کیے جانے والے اقدامات پر تفصیلی بریفنگ دی گئی۔
آئی ایس پی آر کے مطابق فیلڈ مارشل عاصم منیر نے میران شاہ میں یادگارِ شہدا پر حاضری دی اور پھولوں کی چادر چڑھا کر وطن کے دفاع اور سلامتی کے لیے جانوں کا نذرانہ پیش کرنے والے پاک فوج کے شہدا کو خراجِ عقیدت پیش کیا۔ انہوں نے شہدا کی قربانیوں کو یاد کرتے ہوئے ملک کے امن و استحکام کے لیے ان کی خدمات کو سراہا۔
دورے کے موقع پر انہیں دہشت گردی کے خلاف جاری مسلسل کارروائیوں میں حاصل ہونے والی کامیابیوں کو مستحکم کرنے اور علاقے میں پائیدار امن یقینی بنانے کے لیے مرتب کیے گئے اقدامات سے بھی آگاہ کیا گیا۔ بریفنگ میں سیکیورٹی صورتحال اور انٹیلیجنس بنیادوں پر جاری آپریشنز سے متعلق تفصیلات پیش کی گئیں۔
فیلڈ مارشل نے افسران اور جوانوں سے ملاقات کی اور ان کی پیشہ ورانہ تیاری، آپریشنل صلاحیتوں اور ملک کے دفاع کے لیے بلند حوصلے کو سراہا۔ انہوں نے دہشت گردی کے خلاف جنگ میں سیکیورٹی اہلکاروں کے عزم اور خدمات کو قابلِ تحسین قرار دیا۔
آئی ایس پی آر کے مطابق فیلڈ مارشل عاصم منیر نے خیبرپختونخوا پولیس کی کارکردگی اور قربانیوں کو بھی خراجِ تحسین پیش کیا۔ انہوں نے پولیس کو دہشت گردی کے خلاف جنگ میں صفِ اول کا اہم اور بہادر ادارہ قرار دیتے ہوئے کہا کہ پولیس اہلکاروں نے مشکل حالات میں ثابت قدمی کا مظاہرہ کیا ہے۔ انہوں نے پولیس کی استقامت، پیشہ ورانہ خدمات اور قربانیوں پر فخر کا اظہار بھی کیا۔
فیلڈ مارشل عاصم منیر نے اس عزم کا اعادہ کیا کہ سیکیورٹی فورسز اور قانون نافذ کرنے والے دیگر ادارے باہمی تعاون کے ساتھ دہشت گردی کے مکمل خاتمے کے لیے اپنی کوششیں جاری رکھیں گے۔ ان کا کہنا تھا کہ خیبرپختونخوا میں امن و استحکام برقرار رکھنے اور عوام کے تحفظ کو یقینی بنانے کے لیے تمام ضروری اقدامات کیے جاتے رہیں گے۔







