سعودی عرب کے مفتی اعظم شیخ عبدالعزیز بن عبداللہ آل الشیخ نے حج کے لیے آئے مسلمانوں کو ایک اہم پیغام دیا ہے، جس میں انہوں نے حج اجازت نامے کی قانونی حیثیت اور سرکاری ہدایات کی پابندی پر زور دیا ہے۔
اپنے بیان میں مفتی اعظم نے واضح کیا کہ بغیر اجازت حج کرنا نہ صرف شریعت کے اصولوں کے خلاف ہے بلکہ یہ معاشرتی نظم و ضبط کو نقصان پہنچاتا ہے۔ ان کے مطابق ایسے اقدامات بدامنی کا باعث بنتے ہیں اور ان اسلامی تعلیمات کے منافی ہیں جو حج جیسے عظیم عمل کو منظم اور پُرامن طریقے سے انجام دینے پر زور دیتی ہیں۔
مزید پڑھیں: پاکستان انڈیا کشیدگی بڑھی تو صورتحال مزید خطرناک ہو سکتی ہے، جنرل ساحر شمشاد مرزا
انہوں نے کہا کہ حج حکام کی ہدایات کو نظر انداز کرنا نہ صرف قیادت کی نافرمانی ہے بلکہ یہ خود حج کی روح اور تقدس کو متاثر کرتا ہے۔ انہوں نے ایسے طرزعمل کو گناہ قرار دیا جو اس روحانی عبادت کے نظم اور مقصد کو مجروح کرتا ہے۔
مفتی اعظم نے صحت کے حوالے سے بھی سختی سے ہدایات پر عمل کرنے پر زور دیا۔ انہوں نے کہا کہ تمام عازمین کو چاہیے کہ وہ وزارت صحت کی جانب سے تجویز کردہ ویکسینز لگوائیں، کیونکہ صحت عامہ کی حفاظت بھی دینی فریضہ ہے، خاص طور پر ایسے موقع پر جب لاکھوں افراد دنیا بھر سے ایک مقام پر جمع ہوتے ہیں۔
انہوں نے حاجیوں پر زور دیا کہ وہ سیکیورٹی اور صحت کے اہلکاروں سے مکمل تعاون کریں اور تمام ہدایات پر عمل کر کے ایک محفوظ، پُرامن اور روحانی طور پر کامیاب حج ممکن بنائیں۔
انہوں نے خبردار کیا کہ قواعد کی خلاف ورزی نہ صرف قانونی نتائج کا باعث بن سکتی ہے بلکہ اس عبادت کے اصل مقاصد، یعنی عبادت، سلامتی اور سکون، کو بھی خطرے میں ڈال سکتی ہے۔
آخر میں مفتی اعظم نے سعودی قیادت کی کوششوں کو سراہا، خاص طور پر شاہ سلمان بن عبدالعزیز اور ولی عہد محمد بن سلمان کی خدمات کا شکریہ ادا کیا، جنہوں نے حجاج کی سہولت، حفاظت اور روحانی سکون کو یقینی بنانے کے لیے ہر ممکن وسائل فراہم کیے ہیں۔ انہوں نے کہا کہ یہ اقدامات اللہ کے مہمانوں کے احترام اور ان کی خدمت کے لیے سعودی حکومت کے اخلاص کی عکاسی کرتے ہیں۔
