امریکی صدر ڈونلڈ ٹرمپ نے یورپی یونین اور میکسیکو سے درآمد کی جانے والی مصنوعات پر 30 فیصد تجارتی ٹیکس عائد کرنے کا اعلان کر دیا ہے۔
ٹرمپ نے اس فیصلے کی تفصیلات سوشل میڈیا پلیٹ فارمز پر شیئر کیں، جن کے مطابق نیا تجارتی ٹیکس یکم اگست 2025 سے نافذ العمل ہوگا۔
دوسری جانب امریکی صدر کے اس فیصلے پر یورپی یونین کی صدر ارسلا وان ڈیر لین نے شدید ردعمل کا اظہار کرتے ہوئے خبردار کیا کہ اگر امریکا نے یہ ٹیکس نافذ کیا تو یورپی یونین اپنے مفادات کے تحفظ کے لیے سخت جوابی اقدامات کرے گی۔
ان کا کہنا تھا کہ امریکی حکام کے ساتھ تجارتی معاہدوں پر بات چیت جاری رکھنے کے لیے یورپی یونین تیار ہے۔
یاد رہے کہ ٹرمپ ماضی میں بھی متعدد ممالک پر بھاری تجارتی محصولات عائد کر چکے ہیں، جن میں میانمار اور لاؤس پر 40 فیصد، جنوبی افریقا، سری لنکا، الجزائر، عراق اور لیبیا پر 30 فیصد، جاپان، جنوبی کوریا، ملائیشیا، قازقستان، برونائی اور مالدووا پر 25 فیصد، جب کہ فلپائن پر 20 فیصد ٹیکس شامل ہے۔
