بانی پی ٹی آئی کی سابقہ اہلیہ ریحام خان نے اپنی نئی سیاسی پارٹی بنانے کا باقاعدہ اعلان کردیا ہے، جس کا نام ’پاکستان ریپبلک پارٹی‘ ہے۔
کراچی پریس کلب میں پریس کانفرنس کرتے ہوئے ریحام خان کا کہنا تھا کہ پاکستان ریپبلک پارٹی عوام کی آواز بن کر حکمرانوں کا پیچھا کرے گی اور عوامی مسائل کے حل کے لیے بھرپور جدوجہد کرے گی۔
ریحام خان نے کہا ہے کہ ملک میں ایسے وزیرِاعظم بھی آئے، جنہیں ملک کی خبروں کا علم اپنی بیوی یا ٹی وی سے ہوتا تھا۔ وقت آ گیا ہے کہ عوام کے اصل مسائل کو اجاگر کیا جائے اور ایسے نظام کو بدلا جائے، جو صرف چند افراد کے مفادات کا تحفظ کرتا ہے۔
نئی پارٹی کا قیام کرتے ہوئے ان کا کہنا تھا کہ کراچی پریس کلب کو میں نے زبان دی تھی کہ کسی بھی سیاسی اقدام کا آغاز یہاں سے کروں گی، میرے برے حالات میں کراچی پریس کلب نے میرے ساتھ دیا تھا۔
ریحام خان نے کہا ہے کہ اب ماڈرن ٹیکنالوجی آ چکی ہے، کسی کام کا آغاز کریں تو اللہ کا نام لے کر کریں، نیت کرنا بھی بہت ضروری ہے۔ جب بھی کسی اور کے لیے کوئی کام کیا جاتا ہے تو اس میں اللہ پاک برکت ڈالتا ہے۔
انہوں نے کہا کہ 2012 میں بی بی سی میں ملازمت اختیار کی تھی، بی بی سی سے مستعفی ہو کر اپنی والدہ کے پاس 4 سال رہی، مجھے پاکستان سے پیار ہوگیا، میں نے 2012 سے 2025 تک پاکستان کو دیکھا ہے۔
سابقہ اہلیہ عمران خان نے کہاکہ ہماری عوام کے پاس پینے کا پانی نہیں ہے، مجھے ایک بچی نے کہا کہ آپ بھی کہیں ان سیاست دانوں کی طرح نہ ہو جائیں، اسی لیے میں سیاست سے الگ رہی، میں نے خود کو کسی بھی سیاسی ایکشن سے دور رکھا۔
ان کا کہنا تھا کہ پرائم ٹائم پر اب یہ ہے کہ کس کی حکومت گر رہی ہے، کون آ رہا ہے، کون جا رہا ہے، کسی نے کہا کیا آپ محروم صوبوں کی بات کریں گی؟ میں نے کہا سب ہی صوبے محروم ہیں۔
ریحام خان نے کہا کہ میں بہت سوچ بچار کے بعد قدم رکھ رہی ہوں، میرے مطابق کراچی دارالحکومت ہونا چاہیے، کسی سیاسی جماعت اور لیڈر میں کوئی فرق نہیں رہا، مری اور سوات جیسے واقعات پر سیاسی پوائنٹ اسکورنگ کی جاتی ہے۔
انہوں نے کہا کہ کون جیل میں، کون جیل سے باہر جا رہا ہے، ٹی وی پر بیٹھ کر ہاتھا پائی ہو رہی ہے، ایک دوسرے کو برا بھلا کہا جا رہا ہے، خیبرپختونخوا میں کیا حال ہے، گھر میں حق کی بات کریں تو کوئی آپ کو برداشت نہیں کرتا۔
ریحام خان نے دعویٰ کیا کہ آج ایسی تحریک کے ساتھ قدم اٹھا رہی ہوں، جس میں پارلیمنٹ کے چہرے بدل کر دکھاؤں گی، اسمبلیوں میں آج کل پانچ خاندان بیٹھے ہوئے ہیں۔
ان کا کہنا تھا کہ اب صرف نظریہ یہ ہے کہ مجھے وزیر بنانا ہے، میں نے میرٹ کی بنیاد پر کام کیا، چاہتی ہوں لوگ بھی میرٹ پر کام کریں۔
ریحام خان نے کہا کہ بجٹ آیا ہے، جس کے خلاف آج تاجر احتجاج کر رہے ہیں، شوگر کی قیمتوں کا کسی کو پتہ نہیں، مافیا کون ہے، ایف بی آر ان کو پکڑے، آج وڈیرہ کسانوں کی نمائندگی کر رہا ہے، اشیائے ضروریہ کی قیمتوں کو تاجر کنٹرول کر رہے ہیں۔
