راولپنڈی سے لاہور جانے والی ایک نجی کمپنی کی مسافر بس ایم ٹو موٹروے پر بلکسر انٹرچینج کے قریب حادثے کا شکار ہو گئی، جس کے نتیجے میں آٹھ افراد جاں بحق اور 18 زخمی ہو گئے۔
ریسکیو 1122 کے مطابق حادثے کے وقت بس میں کل 40 مسافر سوار تھے۔ جاں بحق ہونے والوں میں تین کمسن بچے بھی شامل ہیں، جن کی عمریں آٹھ ماہ سے دو سال کے درمیان بتائی گئی ہیں۔
ترجمان موٹروے پولیس کے مطابق حادثہ اس وقت پیش آیا، جب بس کا اگلا بایاں ٹائر اچانک پھٹ گیا۔ ڈرائیور گاڑی پر قابو نہ رکھ سکا اور بس الٹ کر کھائی میں جا گری۔ زخمیوں کو فوری طور پر قریبی اسپتالوں میں منتقل کر دیا گیا، جہاں بعض کی حالت تشویش ناک بتائی جا رہی ہے۔
حادثے کے بعد بس کا ڈرائیور موقع سے فرار ہو گیا۔ موٹروے پولیس کا کہنا ہے کہ ڈرائیور کے خلاف مقدمہ درج کیا جا رہا ہے۔ اس طرح کے حادثات میں عموماً ڈرائیور کی غفلت یا لاپرواہی کے امکانات کو مدنظر رکھتے ہوئے قانونی کارروائی عمل میں لائی جاتی ہے۔
ترجمان نے مزید بتایا کہ موٹروے پر چڑھنے والی تمام پبلک سروس گاڑیوں کی ڈیجیٹل اور فزیکل فٹنس انسپیکشن کی جاتی ہے، جسے “پبلک سروس وہیکل مینجمنٹ انفارمیشن سسٹم” کہا جاتا ہے۔ اس نظام کے تحت ٹول پلازہ پر گاڑی کے ٹائر، بریک، باڈی اور ڈرائیور کے لائسنس کی مکمل جانچ کی جاتی ہے۔
ابتدائی اطلاعات کے مطابق شبہ ظاہر کیا جا رہا ہے کہ کسی دوسری گاڑی یا ٹرک سے لوہے کا ٹکڑا گر کر بس کے ٹائر میں چبھ گیا، جس کے باعث ٹائر پھٹنے کا واقعہ پیش آیا۔
مزید پڑھیں: خیبرپختونخوا: وادی تیراہ میں احتجاجی مظاہرے پر فائرنگ، پانچ افراد جاں بحق
اس افسوسناک واقعے کے بعد امدادی کارروائیاں فوری طور پر شروع کی گئیں۔ ریسکیو 1122 اور ایمبولینسز نے جائے وقوعہ پر پہنچ کر زخمیوں کو فوری طبی امداد فراہم کی۔ جاں بحق افراد کی لاشوں کو اسپتال منتقل کر دیا گیا ہے، جب کہ جائے حادثہ پر مزید امدادی ٹیمیں تعینات کر دی گئی ہیں۔
