پاکستان میڈیکل اینڈ ڈینٹل کونسل نے ایم ڈی کیٹ 2025 کے انعقاد کا اعلان کر دیا ہے، جو 5 اکتوبر کی صبح 10 بجے منعقد ہوگا۔
پی ایم ڈی سی کی جانب سے جاری اعلامیے میں بتایا گیا ہے کہ ملک کے مختلف صوبوں اور علاقوں میں اس امتحان کے انعقاد کی ذمہ داری متعلقہ جامعات کو دی گئی ہے۔
پنجاب کے امیدواروں کا امتحان یونیورسٹی آف ہیلتھ سائنسز لاہور لے گی، سندھ میں یہ امتحان آئی بی اے یونیورسٹی سکھر کے تحت ہوگا، جبکہ خیبرپختونخوا میں خیبر میڈیکل یونیورسٹی ایم ڈی کیٹ کا انعقاد کرے گی۔
بلوچستان کے امیدواروں کے لیے ٹیسٹ یونیورسٹی کوئٹہ میں ہوگا۔ وفاقی دارالحکومت، آزاد کشمیر، گلگت بلتستان اور ریاض میں مقیم امیدواروں کے لیے امتحان شہید ذوالفقار علی بھٹو میڈیکل یونیورسٹی اسلام آباد کے زیر انتظام لیا جائے گا۔
مزید پڑھیں: ’غیر معمولی اعزاز‘، فیلڈ مارشل عاصم منیر آئندہ چند روز میں امریکا کا ایک اور دورہ کریں گے
اعلامیے کے مطابق ایم ڈی کیٹ 2025 کے لیے آن لائن رجسٹریشن 8 اگست سے شروع ہو گی جو 25 اگست تک جاری رہے گی، تاہم لیٹ فیس کے ساتھ رجسٹریشن کرانے کی آخری تاریخ یکم ستمبر مقرر کی گئی ہے۔
پاکستان میں امتحان کے لیے فیس 9000 روپے جبکہ لیٹ فیس کے ساتھ 13000 روپے مقرر کی گئی ہے۔
