امیر جماعت اسلامی حافظ نعیم الرحمان پیر بابا بونیر کے دورے پر پہنچ گئے ہیں، جہاں وہ حالیہ سیلابی تباہی سے متاثرہ علاقوں کا جائزہ لیا ہے اور متاثرین اور ان کے اہلِ خانہ سے ملاقات کی ہے۔ انہوں نے جانی و مالی نقصان پر گہرے دکھ اور افسوس کا اظہار کیا۔
حافظ نعیم الرحمان نے کہا کہ الخدمت فاؤنڈیشن نے سانحے کے فوری بعد ریسکیو اور ریلیف کا کام شروع کر دیا تھا اور اس دوران الخدمت کے رضاکار ظہور احمد ریسکیو آپریشن میں شہید ہوئے۔
ان کا کہنا تھا کہ وفاقی اور صوبائی حکومتوں کی ذمہ داری ہے کہ امدادی آپریشن کو تیز کیا جائے اور مواصلاتی نظام اور بجلی کی بحالی میں کوئی تاخیر نہ کی جائے۔
حافظ نعیم الرحمان نے یقین دہانی کروائی کہ جماعت اسلامی نہ صرف فوری ریلیف بلکہ متاثرہ خاندانوں کی مکمل بحالی میں بھی بھرپور کردار ادا کرے گی۔
انہوں نے کہا ہے کہ قوم کا پیسہ قوم پر لگنا چاہیے، ہم اس مشکل گھڑی میں حکومت کے ساتھ بھرپور تعاون کریں گے۔
