امریکی صدر ڈونلڈ ٹرمپ نے فلسطینی تنظیم حماس کو خبردار کیا ہے کہ یرغمالیوں کو انسانی ڈھال کے طور پر استعمال کرنے سے باز رہے ورنہ نتائج سنگین ہوں گے۔
یہ بیان صدر ٹرمپ نے ایک سوشل میڈیا پیغام میں دیا جس میں انہوں نے کہا کہ اطلاعات کے مطابق حماس نے کچھ یرغمالیوں کو زمین پر لا کھڑا کیا ہے تاکہ اسرائیلی فوج کی زمینی کارروائی کے دوران انہیں انسانی ڈھال کے طور پر استعمال کیا جا سکے۔
صدر ٹرمپ نے کہا کہ حماس کو اس بات کا بخوبی علم ہے کہ اس قسم کا اقدام کس قدر خطرناک نتائج کا باعث بن سکتا ہے۔ ان کے مطابق حماس کا یہ ممکنہ اقدام ایک انسانی المیہ ہوگا جس کی دنیا میں مثال کم ہی ملتی ہے۔
مزید براں صدر ٹرمپ نے حماس پر زور دیا کہ یرغمالیوں کو فوراً رہا کیا جائے اور خبردار کیا کہ اگر ایسا نہ ہوا تو تمام شرائط ختم سمجھی جائیں گی۔
اس کے ساتھ ہی صدر ٹرمپ نے قطر کو اپنا اتحادی قرار دیا۔ وائٹ ہاؤس میں صحافیوں سے گفتگو کرتے ہوئے انہوں نے کہا کہ اسرائیل قطر پر دوبارہ حملہ نہیں کرے گا۔
واضع رہے کہ اس بیان پر تاحال حماس یا کسی فلسطینی رہنما کی جانب سے کوئی ردعمل سامنے نہیں آیا۔
امریکی حکومت کی طرف سے مزید اقدامات کے اشارے نہیں دیے گئے تاہم حالات پر کڑی نظر رکھی جا رہی ہے۔
