غزہ کے سرکاری میڈیا آفس نے اپنے بیان میں کہا ہے کہ اسرائیلی فوج اب تک غزہ پٹی کے کل جغرافیائی رقبے کے 77 فیصد حصے پر قبضہ کر چکی ہے۔
غزہ میڈیا آفس کے مطابق یہ قبضہ براہ راست زمینی دراندازی، شہری علاقوں میں قابض افواج کی تعیناتی، غیر منصفانہ جبری بے دخلی کی پالیسیوں اور بھاری بمباری کے ذریعے فلسطینی شہریوں کو ان کے گھروں، علاقوں، زمینوں اور املاک تک رسائی سے روک کر حاصل کیا گیا ہے۔
بیان میں اقوام متحدہ اور عالمی برادری سے مطالبہ کیا گیا ہے کہ وہ اسرائیلی توسیع کو روکنے کے لیے اقدامات کرے۔
سرکاری میڈیا آفس کا کہنا ہے کہ اسرائیل کی مسلسل نسل کشی، جارحیت اور غزہ کی پٹی پر وسیع پیمانے پر قبضہ تمام بین الاقوامی قوانین اور اصولوں کی صریح خلاف ورزی ہے جو طاقت کے ذریعے غزہ پر مکمل مسلط ہونے کے اسرائیلی عزم کی عکاسی کرتا ہے
مزید پڑھیں:یکجہتی غزہ، حافظ نعیم کا 31 مئی کراچی، یکم جون کو حیدرآباد میں جلسوں کا اعلان
عالمی نشریاتی ادارے الجزیرہ کے مطابق آج کی تاریخ میں غزہ میں اسرائیلی حملوں میں کم از کم 22 فلسطینی ہلاک ہو چکے ہیں، جن میں صحافی حسن ماجدی ابو وردہ اور ان کے خاندان کے کئی افراد شامل ہیں۔
حکام کا کہنا ہے کہ اسرائیل نے بدھ سے 100 ٹرکوں کو غزہ میں امداد لے جانے کی اجازت دے دی ہے، جو کہ قحط کا سامنا کرنے والے انکلیو کے 20 لاکھ لوگوں کی مدد کے لیے درکار رقم کے قریب بھی نہیں ہے۔
غزہ کی وزارت صحت کے مطابق، اسرائیل کی غزہ پر جنگ میں کم از کم 53,939 فلسطینی ہلاک اور 122,797 زخمی ہوئے ہیں۔ گورنمنٹ میڈیا آفس نے اپنی ہلاکتوں کی تعداد 61,700 سے زیادہ بتاتے ہوئے کہا کہ ملبے تلے لاپتہ ہونے والے ہزاروں افراد کی ہلاکت کا خدشہ ہے۔
