ایشیا کپ 2025 کا باضابطہ اعلان، میچز کہاں کہاں ہوں گے؟

صدر ایشین کرکٹ کونسل محسن نقوی  نے ایشیا کپ 2025 کا باضابطہ اعلان کر دیا  ہے، جس کے مطابق پاکستان-انڈیا ٹاکرا دبئی میں ہوگا۔

رپورٹس کے مطابق ٹورنامنٹ کے تمام میچز متحدہ عرب امارات کے دو شہروں دبئی اور ابوظہبی میں کھیلے جائیں گے، جب کہ پاکستان کا روایتی حریف انڈیا کے ساتھ ٹاکرا 14 ستمبر 2025 کو دبئی انٹر نیشنل کرکٹ اسٹیڈیم میں ہوگا۔

پاکستان اپنے گروپ اسٹیج کے تینوں میچز دبئی میں کھیلے گا، جب کہ ٹورنامنٹ کے دیگر میچز دبئی اور ابوظہبی کے زید کرکٹ اسٹیڈیم میں منعقد ہوں گے۔

مزید پڑھیں: آئی سی سی کا کرکٹ قوانین میں تبدیلیوں کا اعلان، پلیئنگ کنڈیشن میں کون کون سی تبدیلیاں کی گئیں؟

شیڈول کے مطابق ٹی ٹوئنٹی فارمیٹ میں کھیلے جانے والے اس ٹورنامنٹ میں آٹھ ٹیمیں حصہ لیں گی اور یہ ٹورنامنٹ نو ستمبر سے 28 ستمبر تک جاری رہے گا۔ ٹیموں کو دو گروپوں میں تقسیم کیا گیا ہے، گروپ اے میں پاکستان،انڈیا،یواے ای اور عمان شامل ہیں، جب کہ گروپ میں سری  لنکا،بنگلہ دیش،افغانستان اور ہانگ کانگ شامل ہیں۔

یاد رہے کہ پاکستان اور انڈیا کا میچ ہمیشہ سے شائقین کرکٹ کے لیے خاص اہمیت رکھتا ہے، اس بار میچ حالیہ پاکستان انڈیا کشیدگی کی وجہ سے اور بھی اہمیت حاصل کر چکا ہے، اگر دونوں ٹیمیں سپر فور مرحلے تک پہنچ گئیں تو 21 ستمبر کو دوبارہ مدمقابل ہو سکتی ہیں۔شیڈول کے مطابق ایونٹ کا فائنل 28 ستمبر کو ہوگا، جس کی میزبانی دبئی کرے گا۔