واٹس ایپ نے کہا ہے کہ روس اس کی سروسز کو بند کرنے کی کوشش کر رہا ہے کیونکہ یہ میٹا پلیٹ فارمز کی زیر ملکیت سوشل میڈیا میسجنگ ایپ صارفین کو محفوظ مواصلات کا حق فراہم کرتی ہے۔
کمپنی نے عزم ظاہر کیا ہے کہ وہ روس میں بھی انکرپٹڈ سروسز کی فراہمی جاری رکھنے کی کوشش کرے گی۔
روس نے کچھ ٹیلیگرام اور واٹس ایپ کالز پر پابندی لگانا شروع کر دی ہے، اس الزام کے ساتھ کہ غیر ملکی ملکیت والے پلیٹ فارمز نے قانون نافذ کرنے والے اداروں کے ساتھ دھوکہ دہی اور دہشت گردی کے کیسز میں معلومات شیئر نہیں کیں۔
واٹس ایپ کے بیان میں کہا گیا ہے کہ واٹس ایپ نجی ہے، اینڈ ٹو اینڈ انکرپٹڈ ہے، اور حکومت کی ان کوششوں کو ناکام بناتی ہے جو لوگوں کے محفوظ مواصلات کے حق کو پامال کرنا چاہتی ہیں، اسی لیے روس 10 کروڑ سے زائد روسی عوام کے لیے اسے بند کرنے کی کوشش کر رہا ہے۔
کمپنی نے مزید کہا، “ہم پوری دنیا میں، بشمول روس، اینڈ ٹو اینڈ انکرپٹڈ کمیونی کیشن فراہم کرنے کے لیے ہر ممکن کوشش کرتے رہیں گے۔”
دوسری جانب، ٹیلیگرام نے کہا ہے کہ اس کے ماڈریٹرز مصنوعی ذہانت کے آلات استعمال کرتے ہوئے پلیٹ فارم کے عوامی حصوں کی نگرانی کر رہے ہیں اور روزانہ لاکھوں نقصان دہ پیغامات ہٹا رہے ہیں۔
ٹیلیگرام کے بیان میں کہا گیا، “ٹیلیگرام اپنے پلیٹ فارم کے نقصان دہ استعمال کے خلاف سرگرمی سے کام کرتا ہے، جس میں تخریب کاری یا تشدد کی کالز اور دھوکہ دہی شامل ہیں۔”
یہ بھی پڑھیں: واشنگٹن کے اسلام آباد اور نئی دہلی، دونوں سے اچھے تعلقات ہیں، امریکا
روس کا غیر ملکی ٹیکنالوجی پلیٹ فارمز کے ساتھ مواد اور ڈیٹا اسٹوریج کے معاملات پر کئی سالوں سے تنازع چل رہا ہے، جو فروری 2022 میں یوکرین پر فوجی حملے کے بعد مزید شدید ہو گیا۔
ناقدین کا کہنا ہے کہ روس ملک کے انٹرنیٹ اسپیس پر اپنا کنٹرول بڑھانے کی کوشش کر رہا ہے۔
