ٹاپ اینڈ ٹی ٹوئنٹی سیریز، پاکستان شاہینز کو سیمی فائنل میں شکست

ڈارون میں کھیلے گئے ٹاپ اینڈ ٹی ٹوئنٹی سیریز کے سیمی فائنل میں پاکستان شاہینز کو پرتھ اسکارچرز کے ہاتھوں 48 رنز سے شکست کا سامنا کرنا پڑا اور پرتھ اسکارچرز نے فائنل میں جگہ بنا لی۔

پاکستان شاہینز نے ٹاس جیت کر پہلے باؤلنگ کا فیصلہ کیا، جس کے بعد پرتھ اسکارچرز نے مقررہ 20 اوورز میں 8 وکٹوں کے نقصان پر 155 رنز اسکور کیے۔ ہدف کے تعاقب میں پاکستان شاہینز کی پوری ٹیم 17ویں اوور میں 107 رنز پر ڈھیر ہو گئی۔

پرتھ اسکارچرز کی اننگز میں نکولس ہابسن نے 7 چوکوں اور 2 چھکوں کی مدد سے 59 رنز بنائے۔ ان کی ذمے دارانہ بیٹنگ کی وجہ سے اسکارچرز 69 رنز پر 6 وکٹیں گنوانے کے بعد 155 رنز تک پہنچنے میں کامیاب ہو گئی۔

کپتان وائلی نے 2 چھکوں اور 3 چوکوں کی مدد سے 29 رنز بنائے۔ میتھیو کیلی نے 23 رنز کی اننگز کھیلی جس میں ایک چوکا اور 2 چھکے شامل تھے۔

پاکستان شاہینز کی طرف سے سعد مسعود نے 21 رنز دے کر 3 وکٹیں حاصل کیں۔ مہران ممتاز اور وسیم جونیئر نے بالترتیب 18 اور 35 رنز دے کر 2، 2 کھلاڑیوں کو آؤٹ کیا۔

پاکستان شاہینز کو پہلے ہی اوور میں یاسر خان کا صفر پر نقصان برداشت کرنا پڑا۔تیسرے اوور میں معاذ صداقت 5 رنز بنا کر آؤٹ ہوگئے۔ دونوں بیٹرز کو میتھیو کیلی نے آؤٹ کیا۔ 

عبدالصمد 10، خواجہ نافع 26 اور کپتان عرفان خان 17 رنز بناکر آؤٹ ہوئے تو پاکستان شاہینز کا اسکور دسویں اوور میں 5 وکٹوں پر صرف 65 رنز تھا۔

مزید پڑھیں:انڈیا سے بات چیت کے لیے بھیک مانگنے کا وقت گزر گیا اور اب بات برابری کی بنیاد پر ہوگی، محسن نقوی

کیٹن کریچل نے لگاتار 3 گیندوں پر مبصر خان، سعد مسعود اور مہران ممتاز کو آؤٹ کر کے ہیٹ ٹرک کر ڈالی اور یوں پاکستان شاہینز کی 8 وکٹیں 66 رنز پر گرچکی تھیں۔

کیٹن کریچل نے 13 رنز دے کر 3 وکٹیں حاصل کیں جبکہ میتھیو کیلی اور برائس جیکسن نے 2، 2 کھلاڑیوں کو آؤٹ کیا۔