پاک فوج کے شعبہ تعلقاتِ عامہ (آئی ایس پی آر) نے کہا ہے کہ سیکیورٹی فورسز نے بلوچستان کے ضلع مستونگ میں خفیہ اطلاعات کی بنیاد پر کارروائی کرتے ہوئے انڈین ایجنسیوں کے حمایت یافتہ دہشتگرد گروہ “فتنہ الہندستان” سے تعلق رکھنے والے چار دہشتگردوں کو جہنم واصل کر دیا ہے۔
آئی ایس پی آر کے مطابق دہشتگردوں کی موجودگی کی اطلاع پر خفیہ آپریشن کیا گیا، جس کے دوران سیکیورٹی فورسز نے دہشتگردوں کے ٹھکانے کو مؤثر انداز میں نشانہ بنایا۔ فائرنگ کے شدید تبادلے کے بعد چار دہشتگرد مارے گئے، جب کہ ان کے قبضے سے بھاری مقدار میں اسلحہ، گولہ بارود اور دھماکا خیز مواد بھی برآمد کر لیا گیا۔
ترجمان کے مطابق ہلاک ہونے والے دہشتگرد علاقے میں متعدد تخریبی کارروائیوں میں ملوث رہے ہیں۔
سیکیورٹی فورسز کی جانب سے علاقے میں کلئیرنس آپریشن جاری ہے تاکہ ممکنہ طور پر موجود دیگر دہشتگردوں کا صفایا کیا جا سکے۔
آئی ایس پی آر نے کہا ہے کہ پاکستان کی سیکیورٹی فورسز انڈیا کی پشت پناہی میں ہونے والی دہشتگردی کو جڑ سے اکھاڑنے کیے لیے پرعزم ہیں اور دہشتگردی میں ملوث عناصر کو انصاف کے کٹہرے میں لایا جائے گا۔
