امریکی وزیر خارجہ مارکو روبیو سرکاری دورے پر اسرائیل پہنچ گئے ہیں۔
یہ دورہ اس واقعے کے ایک ہفتے بعد ہو رہا ہے جب اسرائیلی دفاعی افواج نے قطر کے دارالحکومت دوحہ میں حماس کے رہنماؤں کو نشانہ بنایا تھا۔
ٹائمز آف اسرائیل کے مطابق روبیو کا استقبال امریکی سفیر مائیک ہکبی اور دیگر حکام نے ہوائی اڈے پر کیا۔ وہ اپنی اہلیہ جینیٹ دوسدیبس روبیو کے ہمراہ بن گوریون ایئرپورٹ پہنچے۔
یہ ان کا جنوری میں عہدہ سنبھالنے کے بعد دوسرا دورہ ہے۔ اس موقع پر وہ اسرائیل کی سلامتی کے لیے امریکا کے عزم کی تجدید اور غزہ میں حماس کے قبضے میں موجود یرغمالیوں کی رہائی پر زور دینے کا ارادہ رکھتے ہیں۔
اسرائیلی وزیر اعظم کے دفتر کے مطابق آج روبیو اور نیتن یاہو یروشلم میں مغربی دیوار پر ایک ساتھ جائیں گے۔
روانگی کے وقت روبیو نے صحافیوں کو بتایا کہ امریکا اسرائیلی حملے سے خوش نہیں تھا جس میں قطر میں حماس کے رہنماؤں کو نشانہ بنایا گیا، لیکن اس سے واشنگٹن اور اسرائیل کے اتحادی تعلقات متاثر نہیں ہوں گے۔
ان کا کہنا تھا کہ ہمیں اس پر ضرور بات کرنا ہوگی، خاص طور پر کہ اس کا جنگ بندی کی کوششوں پر کیا اثر پڑتا ہے۔
انہوں نے کہا کہ وہ اسرائیلی حکام سے جاننے کی کوشش کریں گے کہ وہ غزہ میں مستقبل کا راستہ کس طرح دیکھتے ہیں۔
صدر ڈونلڈ ٹرمپ کے حوالے سے روبیو نے کہا کہ صدر چاہتے ہیں کہ حماس کو شکست ہو، جنگ ختم ہو، تمام 48 یرغمالی واپس آئیں چاہے وہ زندہ ہوں یا جاں بحق، اور یہ سب ایک ساتھ ہو۔
ان کا مزید کہنا تھا کہ گزشتہ ہفتے کے واقعات کا اس مقصد پر کیا اثر پڑا ہے، اس پر بات کرنا ضروری ہے۔
اسرائیل نے حماس کے رہنماؤں کو اس وقت نشانہ بنایا جب وہ قطر میں جنگ بندی کی امریکی تجویز پر بات کر رہے تھے۔ کل نیتن یاہو نے اس بات کا اشارہ دیا تھا کہ میزائل حملے میں نشانہ بننے والے رہنما مارے نہیں گئے۔
