آئی سی سی بورڈ نے انڈونیشیا کے شہر بالی میں ہونے والے اجلاس کے دوران 2035ء تک بڑے مینز کرکٹ ایونٹس کے انعقاد کے شیڈول کی منظوری دی۔ منظور شدہ شیڈول میں آئی سی سی مینز ٹی 20 ورلڈ کپ، مینز کرکٹ ورلڈ کپ، چیمپئنز ٹرافی اور ورلڈ ٹیسٹ چیمپئن شپ کے فائنلز شامل ہیں۔
آئی سی سی کے مطابق اس شیڈول کا آغاز 2028ء میں آسٹریلیا اور نیوزی لینڈ میں ہونے والے مینز ٹی 20 ورلڈ کپ سے ہوگا، جبکہ اختتام 2035ء کے مینز ون ڈے ورلڈ کپ پر ہوگا۔
ٹی 20 ورلڈ کپ 2028ء سے 2034ء تک
آئی سی سی کے منظور کردہ شیڈول کے مطابق مینز ٹی 20 ورلڈ کپ 2028ء آسٹریلیا اور نیوزی لینڈ کی مشترکہ میزبانی میں 12 اکتوبر سے 12 نومبر تک کھیلا جائے گا۔
2030ء کے ٹی 20 ورلڈ کپ کی میزبانی انگلینڈ، آئرلینڈ اور اسکاٹ لینڈ مشترکہ طور پر کریں گے، جو 4 جولائی سے 4 اگست تک جاری رہے گا۔
2032ء کے ٹی 20 ورلڈ کپ کے لیے 14 اکتوبر سے 14 نومبر کی تاریخیں مقرر کی گئی ہیں، تاہم اس ایونٹ کے میزبان ملک یا ممالک کا اعلان ابھی نہیں کیا گیا۔
اسی طرح 2034ء کا ٹی 20 ورلڈ کپ 6 جولائی سے 6 اگست تک شیڈول ہے، لیکن اس کی میزبانی بھی تاحال غیر حتمی ہے۔
ون ڈے ورلڈ کپ 2027ء، 2031ء اور 2035ء
آئی سی سی کے مطابق اگلا مینز ون ڈے ورلڈ کپ 2027ء میں جنوبی افریقا، زمبابوے اور نمیبیا میں مشترکہ طور پر کھیلا جائے گا۔ ٹورنامنٹ کا آغاز 7 اکتوبر کو ہوگا، جبکہ فائنل 21 نومبر کو شیڈول ہے۔
جنوبی افریقا میں ہونے والے 2027ء کے ورلڈ کپ کے بعد یہ ایونٹ دوبارہ برصغیر میں منعقد ہوگا۔ 2031ء کے ون ڈے ورلڈ کپ کی میزبانی بھارت اور بنگلہ دیش مشترکہ طور پر کریں گے۔ یہ ٹورنامنٹ 9 اکتوبر سے شروع ہوگا، جبکہ فائنل 23 نومبر کو کھیلا جائے گا۔
2035ء کے مینز ورلڈ کپ کے لیے 2 اکتوبر سے 18 نومبر کی تاریخیں مقرر کی گئی ہیں، تاہم اس ٹورنامنٹ کے میزبان ممالک کا اعلان بعد میں کیا جائے گا۔
چیمپئنز ٹرافی 2029ء اور 2033ء
آئی سی سی کے فیصلے کے مطابق مینز چیمپئنز ٹرافی کا اگلا ایڈیشن 2029ء میں بھارت میں کھیلا جائے گا۔ ٹورنامنٹ 9 سے 28 اکتوبر تک جاری رہے گا۔
چیمپئنز ٹرافی کا اگلا ایڈیشن 2033ء میں شیڈول کیا گیا ہے، جس کے لیے 2 سے 23 اکتوبر کی تاریخیں مقرر کی گئی ہیں، تاہم اس ایونٹ کے میزبان ملک کا فیصلہ ابھی نہیں کیا گیا۔
ورلڈ ٹیسٹ چیمپئن شپ کے فائنلز
آئی سی سی نے ورلڈ ٹیسٹ چیمپئن شپ کے فائنلز کے لیے بھی 2035ء تک شیڈول منظور کرلیا ہے۔
2027ء کا فائنل 9 سے 13 جون تک انگلینڈ کے تاریخی گراؤنڈ دی اوول میں کھیلا جائے گا، جبکہ 2029ء کا فائنل 8 سے 12 جون تک انگلینڈ میں ہوگا۔
2031ء کے فائنل کے لیے 12 سے 16 جون کی تاریخیں مقرر کی گئی ہیں، اسی طرح 2033ء کا فائنل 9 سے 13 جون اور 2035ء کا فائنل 7 سے 11 جون تک شیڈول ہے۔
آئی سی سی کے مطابق 2029ء اور 2031ء کے فائنلز کی میزبانی انگلینڈ کرے گا، جبکہ 2033ء اور 2035ء کے فائنلز کے میزبان ممالک کا اعلان بعد میں کیا جائے گا۔
مینز ورلڈ کپ 2027ء کا کوالیفائر
آئی سی سی نے مینز ورلڈ کپ 2027ء کے کوالیفائر کا طریقہ کار بھی منظور کرلیا ہے، جو فروری اور مارچ میں کھیلا جائے گا۔ اس ایونٹ میں 10 ٹیمیں حصہ لیں گی اور مجموعی طور پر 23 میچز ہوں گے۔
ٹیموں کو پانچ، پانچ کے دو گروپس میں تقسیم کیا جائے گا۔ ہر گروپ کی ٹاپ ٹیمیں سیمی فائنل کھیلیں گی، جن کے فاتح فائنل میں مدمقابل ہوں گے۔
کوالیفائر کی ٹاپ چار ٹیمیں ورلڈ کپ 2027ء کے لیے کوالیفائی کریں گی۔ کوالیفائر جیتنے والی ٹیم براہ راست ورلڈ کپ کے گروپ مرحلے میں جگہ بنائے گی، جبکہ باقی تین ٹیمیں آخری گروپ مرحلے کی نشست حاصل کرنے کے لیے سپر سیریز کھیلیں گی۔
مینز ٹی 20 ورلڈ کپ 2028ء کا کوالیفائر
ٹی 20 ورلڈ کپ 2028ء کے لیے 16 ٹیموں پر مشتمل عالمی کوالیفائر 2028ء کی پہلی سہ ماہی میں کھیلا جائے گا، جس میں مجموعی طور پر 31 میچز ہوں گے۔
ان 16 ٹیموں کو چار گروپس میں تقسیم کیا جائے گا، جبکہ کوارٹر فائنلز، سیمی فائنلز اور فائنل کے مراحل کے ذریعے آٹھ ٹیمیں ورلڈ کپ کے لیے کوالیفائی کریں گی۔
آئی سی سی کے منظور کردہ طریقہ کار کے مطابق ہر خطے کی بہترین ٹیم عالمی کوالیفائر کے ذریعے ورلڈ کپ میں براہ راست جگہ حاصل کرے گی، جبکہ باقی نشستیں مجموعی درجہ بندی میں اگلی بہترین ٹیموں کو دی جائیں گی۔
ویمنز ٹی 20 ورلڈ کپ 2028ء کا کوالیفائر
آئی سی سی نے ویمنز ٹی 20 ورلڈ کپ 2028ء کے عالمی کوالیفائر کے لیے علاقائی نشستوں کی تقسیم کی بھی منظوری دے دی ہے۔
نیدرلینڈز اور اسکاٹ لینڈ عالمی کوالیفائر میں براہ راست شرکت کریں گے، جبکہ علاقائی کوالیفائنگ ایونٹس کے ذریعے مزید آٹھ ٹیمیں اس مرحلے تک پہنچیں گی۔
علاقائی کوالیفائرز میں افریقا، ایشیا اور ایسٹ ایشیا پیسیفک سے دو، دو ٹیمیں عالمی کوالیفائر کے لیے جگہ بنائیں گی، جبکہ امریکا اور یورپ سے ایک، ایک ٹیم کوالیفائی کرے گی۔ یہ علاقائی ایونٹس 2027ء میں کھیلے جائیں گے۔
عالمی کوالیفائر کی ٹاپ دو ٹیمیں ویمنز ٹی 20 ورلڈ کپ 2028ء کے لیے کوالیفائی کریں گی۔
لاس اینجلس اولمپکس 2028ء کے کرکٹ کوالیفائرز
آئی سی سی نے لاس اینجلس اولمپکس 2028ء میں کرکٹ کی شمولیت کے لیے مردوں اور خواتین کے کوالیفائرز کے میزبان ممالک اور تاریخوں کا بھی اعلان کردیا ہے۔
مینز کرکٹ اولمپک کوالیفائر 5 سے 13 فروری 2028ء تک بنگلہ دیش میں کھیلا جائے گا، جبکہ ویمنز کرکٹ اولمپک کوالیفائر 26 فروری سے 5 مارچ 2028ء تک امریکا میں ہوگا۔
دونوں کوالیفائرز میں آٹھ، آٹھ ٹیمیں حصہ لیں گی، جنہیں دو گروپس میں تقسیم کیا جائے گا۔ ہر گروپ میں چار ٹیمیں شامل ہوں گی، جبکہ دونوں ایونٹس میں 13، 13 میچز کھیلے جائیں گے۔
گروپ مرحلے کے بعد دونوں گروپس کی فاتح ٹیمیں فائنل میں مدمقابل ہوں گی، جبکہ فائنل جیتنے والی ٹیم لاس اینجلس اولمپکس 2028ء کے لیے کوالیفائی کرے گی۔
آئی سی سی کا طویل مدتی شیڈول پر مؤقف
آئی سی سی کے چیف ایگزیکٹو سنجوگ گپتا کے مطابق بڑے عالمی ٹورنامنٹس کا طویل مدتی شیڈول کھلاڑیوں اور رکن ممالک کو مستقبل کی بہتر منصوبہ بندی، کھلاڑیوں کی تربیت اور اعلیٰ کارکردگی کے پروگرام ترتیب دینے میں مدد فراہم کرے گا۔
واضح رہے کہ اس وقت آسٹریلیا ون ڈے ورلڈ کپ کا دفاعی چیمپئن ہے، جنوبی افریقا کے پاس ورلڈ ٹیسٹ چیمپئن شپ کا اعزاز ہے، جبکہ بھارت ٹی 20 ورلڈ کپ اور چیمپئنز ٹرافی کا موجودہ چیمپئن ہے۔
