انڈیا کے شہر گوہاٹی میں کھیلے جارہے دوسرے ون ڈے میں انڈیا نے ٹاس جیت کر پہلے فیلڈنگ کا فیصلہ کیا، جس کے بعد ویسٹ انڈیز نے مقررہ 50 اوورز میں 7 وکٹوں کے نقصان پر 405 رنز کا بڑا مجموعہ اسکور کیا۔
ویسٹ انڈیز کی جانب سے جان کیمبل اور کیسی کارٹی نے اننگز کا آغاز کیا، تاہم 37 کے مجموعی اسکور پر ویسٹ انڈیز کو پہلا نقصان اٹھانا پڑا۔ کیسی کارٹی صرف 9 رنز بنانے کے بعد پرسدھ کرشنا کی گیند پر کیچ آؤٹ ہوگئے۔
اس کے بعد جان کیمبل نے کپتان شائی ہوپ کے ساتھ مل کر اننگز کو آگے بڑھایا۔ کیمبل نے جارحانہ انداز میں بیٹنگ کرتے ہوئے وکٹ کے چاروں اطراف دلکش اسٹروکس کھیلے اور بھارتی بولرز کو دباؤ میں رکھا۔ انہوں نے شاندار بیٹنگ کرتے ہوئے اپنی سنچری بھی مکمل کی۔
دونوں بلے بازوں کے درمیان دوسری وکٹ کے لیے 110 رنز کی شراکت داری قائم ہوئی۔ ٹیم کا اسکور 147 رنز تک پہنچا تو جان کیمبل 9 چوکوں اور 5 چھکوں کی مدد سے 101 رنز بناکر گرنور برار کی گیند پر آؤٹ ہوگئے۔
کیمبل کے آؤٹ ہونے کے بعد بھی ویسٹ انڈیز کے بلے بازوں نے جارحانہ بیٹنگ کا سلسلہ جاری رکھا۔ کریز پر آنے والے عامر جانگو نے شائی ہوپ کے ساتھ مل کر ٹیم کا اسکور تیزی سے آگے بڑھایا۔ دونوں نے شاندار سنچریاں اسکور کیں اور تیسری وکٹ کے لیے 182 رنز کی بڑی شراکت قائم کی۔
ویسٹ انڈیز کی جانب سے جان کیمبل، شائی ہوپ اور عامر جانگو نے سنچریاں اسکور کیں۔ ون ڈے کرکٹ میں یہ صرف چھٹا موقع ہے جب کسی ٹیم کے تین بلے بازوں نے ایک ہی اننگز میں سنچریاں بنائی ہوں۔
329 کے مجموعی اسکور پر شائی ہوپ 8 چوکوں اور 3 چھکوں کی مدد سے 104 رنز بناکر کلدیپ یادیو کا شکار ہوگئے۔
اس کے بعد 330 کے اسکور پر ویسٹ انڈیز کو چوتھا نقصان اٹھانا پڑا اور شیرفین ردرفورڈ بغیر کوئی رن بنائے پویلین لوٹ گئے۔
348 کے مجموعی اسکور پر عامر جانگو بھی 13 چوکوں اور 3 چھکوں کی مدد سے 114 رنز کی شاندار اننگز کھیل کر آؤٹ ہوگئے۔
369 کے اسکور پر کیمو پال صرف 3 رنز بناکر آؤٹ ہوئے، جبکہ 385 کے مجموعی اسکور پر الزاری جوزف 8 رنز بناکر پویلین لوٹ گئے۔ روسٹن چیز 29 اور شمر جوزف 14 رنز کے ساتھ ناٹ آؤٹ رہے۔
یوں ویسٹ انڈیز نے مقررہ 50 اوورز میں 7 وکٹوں کے نقصان پر 405 رنز بنائے اور انڈیا کو میچ جیتنے کے لیے 406 رنز کا ہدف دیا۔ یہ ویسٹ انڈیز کا ون ڈے کرکٹ میں اب تک کا سب سے بڑا مجموعہ بھی ہے۔
انڈیا کی جانب سے گرنور برار، رویندر جڈیجا اور کلدیپ یادیو نے 2،2 وکٹیں حاصل کیں، جبکہ پرسدھ کرشنا کے حصے میں ایک وکٹ آئی۔ کلدیپ یادیو نے میچ میں 200 ون ڈے وکٹیں مکمل کرنے کا اعزاز بھی حاصل کرلیا۔
واضح رہے کہ انڈیا اور ویسٹ انڈیز کی ٹیمیں 3 میچوں پر مشتمل ون ڈے سیریز کے دوسرے میچ میں گوہاٹی کے برساپارا کرکٹ اسٹیڈیم میں مدمقابل ہیں۔ بھارتی کپتان شبھمن گل نے ٹاس جیت کر پہلے فیلڈنگ کا فیصلہ کیا۔
یاد رہے کہ 3 میچوں کی سیریز میں انڈیا کو ایک صفر کی برتری حاصل ہے۔ پہلے ون ڈے میں انڈیا نے ویسٹ انڈیز کو 8 وکٹوں سے شکست دی تھی۔
پہلے میچ میں ویرات کوہلی نے ناقابلِ شکست 139 رنز جبکہ کپتان شبھمن گل نے 110 رنز کی شاندار اننگز کھیلی تھی۔ انڈیا نے ویسٹ انڈیز کا 295 رنز کا ہدف 41.4 اوورز میں 2 وکٹوں کے نقصان پر حاصل کرلیا تھا۔
