لارڈز میں کھیلے جا رہے میچ میں پاکستان نے ٹاس جیت کر انگلینڈ کو پہلے بیٹنگ کی دعوت دی۔ بارش کے باعث کھیل ایک گھنٹے سے زائد تاخیر سے شروع ہوا، تاہم محمد عباس نے مختصر اسپیل میں انگلینڈ کی بیٹنگ لائن کو شدید مشکلات سے دوچار کردیا۔
36 رنز کے مجموعے پر انگلینڈ کی تین وکٹیں گر چکی تھیں۔ محمد عباس نے صرف 16 گیندوں پر 4 رنز دے کر 3 وکٹیں حاصل کیں، جبکہ کپتان جو روٹ صرف 4 رنز بنا کر آؤٹ ہوئے۔
بین ڈکٹ 17 رنز بناکر آؤٹ ہوئے، پاکستان نے ریویو کے ذریعے انہیں ایل بی ڈبلیو قرار دلوایا۔ جو روٹ کو ابتدا میں سلپس میں کیچ ڈراپ ہونے کے بعد موقع بھی ملا، تاہم وہ اس سے فائدہ نہ اٹھا سکے اور بعد میں محمد علی کی گیند پر ایل بی ڈبلیو ہوگئے۔
ہیری بروک 15 رنز بناکر محمد علی کی گیند پر بولڈ ہوئے جبکہ ڈین لارنس 17 رنز بناکر رن آؤٹ ہوگئے۔
پاکستان کی جانب سے محمد عباس نے شاندار واپسی کی۔ 36 سالہ فاسٹ بولر انگلینڈ میں کاؤنٹی کرکٹ کھیلنے کے باعث وہاں کی کنڈیشنز سے بخوبی واقف ہیں۔ وہ 2018 میں لارڈز ہی میں پاکستان کی انگلینڈ کے خلاف نو وکٹوں سے فتح کے دوران مین آف دی میچ بھی رہے تھے، اس میچ میں انہوں نے 8 وکٹیں حاصل کی تھیں۔
انگلی کی انجری کے باعث پہلے ٹیسٹ سے باہر رہنے والے بابر اعظم نے دوسرے ٹیسٹ میں واپسی کرتے ہوئے ٹاس جیتا۔ پاکستان پہلے ٹیسٹ میں انگلینڈ کے ہاتھوں 103 رنز سے شکست کھا چکا ہے۔
تازہ صورتحال کے مطابق انگلینڈ نے 5 وکٹوں کے نقصان پر 152 رنز بنا لیے ہیں۔ جارڈن کاکس نصف سنچری مکمل کرچکے ہیں جبکہ جیمی اسمتھ 25 رنز کے ساتھ کریز پر موجود ہیں۔
