ایرانی خبر رساں ادارے ارنا نے باخبر ذرائع کے حوالے سے رپورٹ کیا ہے کہ سوئٹزرلینڈ میں تقریباً 18 گھنٹے جاری رہنے والے مذاکرات کے دوران جوہری پروگرام سے متعلق کوئی بات چیت نہیں ہوئی اور نہ ہی ایران نے اس حوالے سے کوئی نیا وعدہ کیا۔

ذرائع کے مطابق اسلام آباد مفاہمتی یادداشت کے فریم ورک کے تحت جوہری مذاکرات کا باقاعدہ آغاز یادداشت کی شق نمبر 13 پر عمل درآمد سے مشروط ہے۔

مفاہمتی یادداشت کے پیراگراف 13 کے مطابق حتمی معاہدے پر مذاکرات اسی وقت شروع ہوں گے جب شق نمبر 1، 4، 5، 10 اور 11 پر عمل درآمد ہو جائے۔

یادداشت کی پہلی شق کے مطابق لبنان سمیت تمام محاذوں پر فوجی کارروائیوں کا فوری اور مستقل خاتمہ ضروری قرار دیا گیا ہے۔

واضح رہے کہ اس سے قبل امریکی نائب صدر جے ڈی وینس نے دعویٰ کیا تھا کہ ایران نے عالمی جوہری توانائی ایجنسی کے معائنہ کاروں کو دوبارہ ایران آنے کی اجازت دینے پر اتفاق کر لیا ہے۔