منگل کے روز ماسکو میں گفتگو کرتے ہوئے انہوں نے کہا کہ اگرچہ امریکا اور اسرائیل ایران پر حملے کر رہے ہیں، تاہم روس کے پاس ایسے شواہد موجود نہیں جو یہ ثابت کریں کہ تہران جوہری ہتھیار بنانے میں مصروف تھا۔

ان کا کہنا تھا کہ امریکی صدر ڈونلڈٹرمپ نے ایران کے خلاف کارروائی کے لیے مختلف وجوہات بیان کی ہیں۔ پیر کے روز اپنے حالیہ اور تفصیلی عوامی بیان میں انہوں نے کہا کہ حملوں کا حکم تہران کے جوہری اور بیلسٹک میزائل پروگرام کو ناکام بنانے کے لیے دیا گیا۔

سرگئی لاوروف نے ماسکو میں برونائی کے وزیرِ خارجہ سے گفتگو کرتے ہوئے کہاکہ ہمیں ابھی تک اس بات کا کوئی ثبوت نہیں ملا کہ ایران جوہری ہتھیار تیار کر رہا تھا، جو اس جنگ کا واحد نہیں تو بنیادی جواز ضرور قرار دیا جا رہا ہے۔

انہوں نے کہا کہ ایران پر حملوں کے اثرات پورے خطے میں محسوس کیے جا رہے ہیں اور عرب ممالک کو معاشی اور جانی نقصان اٹھانا پڑ رہا ہے۔

روسی وزیرِ خارجہ نے تمام فریقین سے فوری طور پر دشمنی ختم کرنے کا مطالبہ دہراتے ہوئے کہاکہ غیر مشروط ابتدائی اقدام کے طور پر ہمیں ہر ممکن کوشش کرنی چاہیے کہ ایسی کسی بھی کارروائی کو روکا جائے جس کے نتیجے میں شہری ہلاکتیں ہوں۔

انہوں نے ایران میں ایک اسکول پر مبینہ بم دھماکے کا بھی حوالہ دیا۔

ایرانی سرکاری میڈیا کے مطابق اسرائیلی اور امریکی حملوں کے دوران جنوبی ایران کے ایک قصبے میں کمسن بچیوں کے پرائمری اسکول کو نشانہ بنایا گیا، جس کے نتیجے میں تقریباً 169 بچے شہید  ہوئے۔