ملاقات کے دوران ترک سفیر نے حالیہ اعلیٰ سطحی رابطوں کے تناظر میں پاکستان اور ترکیہ کے درمیان مختلف ادارہ جاتی فورمز کے تحت ہونے والی پیش رفت سے نائب وزیراعظم کو آگاہ کیا۔ دونوں جانب سے اس امر پر زور دیا گیا کہ موجودہ دوطرفہ تعاون کو مزید آگے بڑھانے کے لیے متعلقہ اداروں کے درمیان مسلسل رابطہ اور مؤثر رابطہ کاری ضروری ہے۔
نائب وزیراعظم اسحاق ڈار نے پاکستان اور ترکیہ کے درمیان دیرینہ اور دوستانہ تعلقات کو مزید مضبوط بنانے کے عزم کا اعادہ کیا، پاکستان ترجیحی شعبوں میں ترکیہ کے ساتھ تعاون کو وسعت دینے اور دونوں ممالک کے درمیان موجودہ شراکت داری کو نئی جہت دینے کا خواہاں ہے۔
اسحاق ڈار نے کہا کہ دونوں ممالک کے متعلقہ اداروں کو آئندہ ہونے والے مشترکہ کمیشن کے اجلاس کی تیاریوں کے لیے قریبی رابطے میں رہنا ہوگا۔ انہوں نے اعلیٰ سطحی اسٹریٹجک تعاون کونسل کے آٹھویں اجلاس کی تیاریوں کو بھی اہم قرار دیتے ہوئے کہا کہ اس فورم کے ذریعے دوطرفہ ایجنڈے پر عملی پیش رفت کو مزید آگے بڑھایا جا سکتا ہے۔
ملاقات میں پاکستان اور ترکیہ کے درمیان مختلف شعبوں میں جاری تعاون اور مستقبل میں باہمی شراکت داری کے امکانات کا بھی جائزہ لیا گیا۔ فریقین نے ادارہ جاتی روابط کو مضبوط بنانے اور دونوں ممالک کے درمیان اعلیٰ سطحی رابطوں کو نتیجہ خیز بنانے کی ضرورت پر اتفاق کیا۔
ملاقات کے دوران خطے کی مجموعی صورتحال اور بدلتے ہوئے علاقائی حالات پر بھی تبادلہ خیال کیا گیا۔ نائب وزیراعظم اسحاق ڈار نے اس موقع پر کہا کہ خطے میں دیرپا امن، استحکام اور معاشی خوشحالی کے لیے مذاکرات اور سفارت کاری کو ترجیح دینا ضروری ہے۔
انہوں نے کہا کہ علاقائی مسائل کا پائیدار حل بات چیت اور سفارتی ذرائع سے ہی تلاش کیا جا سکتا ہے، جبکہ باہمی تعاون اور رابطوں میں اضافہ خطے میں امن و استحکام کے لیے معاون ثابت ہوسکتا ہے۔
دونوں جانب سے اس بات پر اتفاق کیا گیا کہ پاکستان اور ترکیہ کے درمیان موجود اعلیٰ سطحی سیاسی روابط کو ادارہ جاتی تعاون کے ذریعے مزید مستحکم کیا جائے گا اور مختلف شعبوں میں دوطرفہ ایجنڈے پر پیش رفت کے لیے متعلقہ ادارے باہمی رابطہ کاری جاری رکھیں گے۔
