ایرانی وزارت خارجہ کے ترجمان اسماعیل بقائی نے سماجی رابطے کی ویب سائٹ ایکس پر جرمن زبان میں بیان دیتے ہوئے جرمن چانسلر فریڈرِش میرٹس پر دوغلے پن کا الزام عائد کیا۔

انہوں نے کہا کہ امریکا اور اسرائیل کی جانب سے ایران کی محفوظ جوہری تنصیبات، جو عالمی جوہری ادارے کی نگرانی میں ہیں، پر حملوں کی نہ صرف مذمت نہیں کی جاتی بلکہ انہیں جواز بھی فراہم کیا جاتا ہے۔ 

تاہم جب کوئی ایسا واقعہ پیش آتا ہے جسے انہوں نے ’فالس فلیگ آپریشن‘ قرار دیا اور جس کی ذمہ داری خود امارات نے بھی ایران پر عائد نہیں کی، تو وہی حلقے اچانک بین الاقوامی قانون اور علاقائی سلامتی کی بات کرنے لگتے ہیں۔

اسماعیل بقائی نے مزید کہا کہ اگر جوہری تنصیبات پر حملہ واقعی خطے کے عوام کے لیے خطرہ ہے تو یہ اصول سب پر یکساں طور پر لاگو ہونا چاہیے، نہ کہ صرف اس وقت جب مغربی ممالک کے سیاسی مفادات وابستہ ہوں۔

دوسری جانب جرمن چانسلر فریڈرِش میرٹس نے ایک روز قبل ایران کی جانب سے متحدہ عرب امارات اور دیگر ممالک پر مبینہ فضائی حملوں کی مذمت کرتے ہوئے کہا تھا کہ جوہری تنصیبات پر حملے پورے خطے کی سلامتی کے لیے خطرہ ہیں۔

یاد رہے کہ اتوار کے روز متحدہ عرب امارات نے بتایا تھا کہ ابوظہبی کے قریب واقع براکہ جوہری پلانٹ کے باہر ایک ڈرون حملے میں بجلی کے جنریٹر میں آگ لگ گئی تھی۔

اماراتی حکام نے اپنے بیان میں کسی ملک کا نام نہیں لیا تھا بلکہ صرف یہ کہا تھا کہ ڈرون مغربی سرحد کی جانب سے داخل ہوا۔