غیرملکی نشریاتی ادارے الجزیرہ کے مطابق وائٹ ہاؤس میں صحافیوں سے گفتگو کرتے ہوئے ٹرمپ نے کہا کہ ہم نے ایران میں بہت سا اسلحہ بھیجا تاکہ لوگ اپنا دفاع کر سکیں، امریکا اس وقت ایران کو  تباہ  کر رہا ہے۔

انہوں نے عندیہ دیا کہ ایرانی انفراسٹرکچر، بشمول پلوں اور بجلی گھروں، کو شدید نقصان پہنچایا جا سکتا ہے۔ ان کا کہنا تھا کہ وہاں نہ پل ہوں گے، نہ پاور پلانٹس، کچھ بھی نہیں بچے گا۔

ڈونلڈ ٹرمپ نے جنگ کی مخالفت کرنے والے امریکی شہریوں کو  نادان  قرار دیتے ہوئے کہا کہ یہ جنگ ایک بنیادی مقصد کے لیے ہے کہ ایران جوہری ہتھیار حاصل نہ کر سکے۔

خیال رہے کہ امریکی صدر نے نہ ہی یہ واضح کیا ہے کہ یہ اسلحہ کس کے پاس گیا یا کس گروہ نے اسے اپنے پاس رکھا اور نہ ہی مزید کچھ تفصیلات بتائیں کہ کس طرح سے ایران کے پاور پلانٹس کو تباہ کیا جائے گا۔

دوسری جانب ماہرین کا کہنا ہے کہ کسی ملک کے شہری انفراسٹرکچر کو نشانہ بنانا بین الاقوامی قوانین کے تحت جنگی جرم کے زمرے میں آتا ہے، جس سے خطے میں کشیدگی مزید بڑھنے کا خدشہ ہے۔