سماجی رابطے کی سائٹ ایکس (سابق ٹوئٹر) پر اپنے بیان میں حافظ نعیم الرحمان نے کہا کہ یہ وہی خصوصی عدالت ہے جس نے درجنوں محب وطن اور اسلامی رہنماؤں کو پھانسیوں کے تختے پر چڑھایا تھا۔ آج بنگلہ دیش میں پیش آنے والا واقعہ پوری دنیا کے لیے ایک عبرت ناک مثال ہے۔

انہوں نے کہا کہ انڈین سرپرستی میں پروان چڑھنے والی شیخ حسینہ واجد نے اپنے پندرہ سالہ دورِ اقتدار میں جھوٹے مقدمات کی سیاست کو فروغ دیا، عدالتی فیصلوں کو انتقام کا ہتھیار بنایا اور فسطائیت پر مبنی طرزِ حکمرانی اختیار کی۔

امیر جماعتِ اسلامی نے کہا کہ انڈیا کے مکمل تعاون اور قومی مفادات کے مبینہ سودے کے باوجود شیخ حسینہ نئی نسل کو گمراہ نہیں کر سکیں، آج کا فیصلہ اُن تمام جابروں، ظالموں اور جھوٹ پر قائم حکمرانی کرنے والوں کے لیے واضح تنبیہ ہے۔

واضح رہے کہ حافظ نعیم الرحمان نے اپنے بیان میں ان تمام مظلوموں سے یکجہتی کا اظہار بھی کیا جنہوں نے اس دور میں سیاسی جبر اور ظلم کا سامنا کیا۔