سکیورٹی ذرائع کے مطابق افغان طالبان نے سول آبادی پر بلااشتعال جارحیت کی۔ یہ کارروائی باجوڑ کے سرحدی علاقے کٹ کوٹ کے گاؤں ملک شاہین میں کی گئی۔

سکیورٹی ذرائع نے بتایا کہ اس گولہ باری کے نتیجے میں دو بچوں سمیت تین افراد شہید جبکہ تین افراد شدید زخمی ہو گئے، جنہیں فوری طور پر اسپتال منتقل کر دیا گیا۔

ذرائع کے مطابق بلااشتعال فائرنگ کے دوران ایک ہی گھر کو نشانہ بنایا گیا، جہاں ایک خاتون اور دو بچے شہید ہوئے۔

سکیورٹی ذرائع کا کہنا ہے کہ افغان طالبان گزشتہ چند روز سے فتنہ الخوارج کے ایک گروہ کو پاکستان میں داخل کرانے کی کوشش کر رہے تھے، تاہم پاک فوج کی بروقت کارروائی کے باعث دراندازی کی یہ کوشش ناکام بنا دی گئی۔ اس ناکامی کے بعد افغان طالبان نے کٹ کوٹ میں پاکستانی سول آبادی کو نشانہ بنایا۔

ذرائع کے مطابق پاک فوج کی جانب سے جوابی کارروائی جاری ہے اور باجوڑ سے ملحقہ افغان طالبان کی تمام چوکیوں کو نشانہ بنایا جا رہا ہے، جس کے نتیجے میں افغان طالبان کو بھاری جانی نقصان اٹھانا پڑا ہے۔