عالمی دنِ تحمل و برداشت کے موقع پر وفاقی وزیر کا کہنا تھا کہ تحمل اور برداشت صرف اخلاقی اصول نہیں بلکہ امن، انصاف اور پائیدار ترقی کی اساس ہیں۔ پاکستان کا آئین اور قومی وژن تمام شہریوں کے مساوی حقوق اور وقار کی ضمانت دیتے ہیں، جبکہ اسلامی تعلیمات اور قائداعظم محمد علی جناح کی رہنمائی ہمیں یاد دلاتی ہے کہ ہم سب ایک ریاست کے برابر شہری ہیں۔

اعظم نذیر تارڑ نے کہا کہ اختلافات کو تسلیم کرنا، ایک دوسرے سے سیکھنا اور کمزور طبقات کی مدد کرنا معاشرتی ہم آہنگی کے لیے ناگزیر ہے۔

انہوں نے کہا کہ وزارتِ انسانی حقوق پسماندہ اور مخدوش طبقات کے حقوق کے تحفظ کے لیے بھرپور عزم رکھتی ہے اور معاشرے میں انصاف، شمولیت اور رواداری کے فروغ پر مسلسل کام کر رہی ہے۔

وفاقی وزیر نے شہریوں، اداروں، میڈیا اور مذہبی رہنماؤں سے اپیل کی کہ وہ باہمی احترام اور برداشت کو فروغ دیں تاکہ ایک ایسا معاشرہ تشکیل پا سکے جہاں تنوع کو عزت ملے، اتحاد مضبوط ہو اور ہر فرد باوقار زندگی گزار سکے۔