مریم نواز نے کابینہ اراکین کو واضح ہدایت کی کہ وہ نہ صرف خود اے آئی کی مہارت حاصل کریں بلکہ اپنے متعلقہ محکموں میں بھی اس ٹیکنالوجی کے استعمال کو فروغ دیں اور ملازمین کی تربیت کے لیے اقدامات کریں۔ انہوں نے کہا، "یہ وقت ہے کہ ہم سب اے آئی کی طاقت کو سمجھیں اور اسے عوامی بہبود کے لیے بروئے کار لائیں۔"
گوگل کی ٹیم نے ملاقات کے دوران گورننس، ایڈمنسٹریشن اور پبلک سروسز میں اے آئی کے مختلف ایپلی کیشنز کے عملی استعمال پر بریفنگ دی۔ ملاقات میں کابینہ کے کئی وزراء شریک تھے اور اس کے فوراً بعد وزراء کو ٹریننگ کی ہدایت جاری کر دی گئی۔
صوبائی وزیر اطلاعات و نشریات عظمیٰ بخاری نے اس اقدام کو سراہتے ہوئے کہا کہ "میں یہ تربیت لازمی حاصل کروں گی کیونکہ ہر شعبے میں جدت اور ٹیکنالوجی کا استعمال بڑھ رہا ہے۔ اے آئی ٹولز ہماری روزمرہ کی کاموں میں وقت اور وسائل کی بچت کریں گے اور کام کی رفتار بڑھائیں گے۔ یہ اقدام پنجاب کو ڈیجیٹل طور پر مضبوط بنانے میں مددگار ثابت ہوگا۔"
ماہرین کا کہنا ہے کہ اے آئی کی تربیت سے وزراء اور سرکاری افسران جدید ٹولز کو استعمال کرنے کی صلاحیت حاصل کریں گے، جو نہ صرف محکموں کی کارکردگی میں اضافہ کرے گا بلکہ عوامی خدمات کی فراہمی کو بھی زیادہ مؤثر بنائے گا۔
حکومتی ذرائع کے مطابق، یہ ٹریننگ پروگرام جلد شروع کیا جائے گا اور گوگل سمیت دیگر ٹیکنالوجی کمپنیوں سے تعاون حاصل کیا جائے گا۔ یہ اقدام صوبے میں ڈیجیٹل انقلاب کی جانب ایک اہم قدم تصور کیا جا رہا ہے، جس کا مقصد محکموں کی اصلاح، پالیسی سازی اور عوامی فلاح و بہبود میں تیزی لانا ہے۔
