گروپ کے اہم مقابلے میں الجزائر اور آسٹریا کے درمیان سنسنی خیز میچ برابر رہا، تاہم بہتر گول ریٹ اور مضبوط دفاعی ریکارڈ کی بنیاد پر دونوں ٹیمیں اگلے مرحلے میں رسائی حاصل کرنے میں کامیاب رہیں۔ اس نتیجے کے بعد ایران کی ٹیم ناک آؤٹ مرحلے تک پہنچنے میں ناکام رہی اور ورلڈکپ سے اس کا سفر اختتام پذیر ہوگیا۔

آسٹریا کے لیے یہ کامیابی تاریخی حیثیت رکھتی ہے، کیونکہ ٹیم نے 72 برس بعد پہلی مرتبہ فیفا ورلڈکپ کے ناک آؤٹ مرحلے میں جگہ بنائی ہے، راؤنڈ آف 32 میں آسٹریا کا مقابلہ مضبوط حریف اسپین سے ہوگا، جبکہ الجزائر کی ٹیم سوئٹزرلینڈ کے خلاف میدان میں اترے گی۔

دوسری جانب گروپ کے ایک اور اہم میچ میں ارجنٹینا نے اُردن کو ایک کے مقابلے میں تین گول سے شکست دے کر اپنی مسلسل تیسری کامیابی حاصل کر لی، ارجنٹینا کی جانب سے گیوانی، لاؤتارو مارٹینز اور لیونل میسی نے ایک، ایک گول اسکور کیا، جبکہ اُردن کی جانب سے واحد گول موسیٰ التماری نے کیا۔

ارجنٹینا نے گروپ مرحلے کے تینوں میچز جیت کر مجموعی طور پر 9 پوائنٹس حاصل کیے اور بھرپور انداز میں ناک آؤٹ مرحلے کے لیے کوالیفائی کر لیا۔

ادھر ایرانی ٹیم کی جانب سے پہلے ہی ٹورنامنٹ کے دوران فیصلوں پر تحفظات کا اظہار کیا جا چکا تھا، تاہم گروپ مرحلے کے اختتام پر ایران ایونٹ سے باہر ہونے والی ٹیموں میں شامل ہوگیا، جبکہ آسٹریا اور الجزائر نے اگلے مرحلے میں جگہ بنا کر اپنی مہم کامیابی سے جاری رکھی۔