ڈاکٹروں کے مطابق طالبہ کو وینٹی لیٹر سے ہٹا دیا گیا ہے اور اب وہ خود سانس لے رہی ہیں۔ تاہم آکسیجن سپورٹ بدستور جاری ہے جبکہ ان کے ہیمو ڈائنامکس بھی مستحکم ہو چکے ہیں۔ طبی عملے کا کہنا ہے کہ مریضہ کی حالت تسلی بخش ہے اور انہیں مسلسل مانیٹر کیا جا رہا ہے۔

دوسری جانب پنجاب اسمبلی کی رکن حنا پرویز بٹ نے سماجی رابطے کی ویب سائٹ ایکس پر بیان میں کہا کہ لاہور کی ایک نجی یونیورسٹی میں زیرِ تعلیم طالبہ کے اقدامِ خودکشی کے واقعے پر وزیراعلیٰ مریم نواز کی ہدایت پر انہوں نے لاہور جنرل ہسپتال کا دورہ کیا۔

انہوں نے بتایا کہ ہسپتال میں زیرِ علاج طالبہ اور اس کے اہلِ خانہ سے ملاقات کی، ان سے اظہارِ ہمدردی کیا اور طالبہ کی صحت سے متعلق ڈاکٹروں سے تفصیلی بریفنگ لی۔ ہسپتال انتظامیہ کے مطابق طالبہ ہوش میں آ چکی ہے، وینٹی لیٹر سے ہٹا دی گئی ہے اور اس کی حالت میں واضح بہتری آئی ہے۔