میڈیا سے گفتگو کرتے ہوئے سلمان اکرم راجا نے کہا کہ بظاہر ایسا محسوس ہوتا ہے کہ پی ٹی آئی کے خلاف منظم انداز میں ایک مہم چلائی جا رہی ہے۔ ہم بخوبی جانتے ہیں کہ سہیل آفریدی کے وزیراعلیٰ بننے پر کس کو تکلیف ہوئی اور کون یہ نہیں چاہتا تھا۔

انہوں نے مزید کہا کہ وزیراعلیٰ سہیل آفریدی جس طریقے سے وزیراعلیٰ بنے، وہ سب کے سامنے ہے۔ میں سہیل آفریدی کے ساتھ قانونی طور پر کھڑا رہا ہوں۔

سلمان اکرم راجا سے جب بانی پی ٹی آئی عمران خان کی بہن علیمہ خان کے اس بیان سے متعلق سوال کیا گیا کہ مشال یوسفزئی عمران خان اور پی ٹی آئی کی وفادار نہیں ہیں، تو انہوں نے جواب دیا کہ مشال جن کی ہدایات پر جھوٹ بولتی ہیں، وہ انہی کی ذمہ داری پوری کر رہی ہیں۔ ان کے مطابق مشال یوسفزئی عمران خان کی خیرخواہ نہیں ہیں۔

سلمان اکرم راجا نے کہا کہ مشال یوسفزئی کا علیمہ خان سے متعلق بیان لغو اور جھوٹ پر مبنی ہے۔ عمران خان کی بہنیں ان کے لیے خلوص کا حصار ہیں اور جو شخص جھوٹ بولتا ہو وہ عمران خان کا وفادار کیسے ہو سکتا ہے۔

انہوں نے کہا کہ اڈیالہ جیل کے باہر دھرنا علیمہ خان کے کہنے پر ختم کرنے کا دعویٰ بالکل جھوٹ ہے۔ جو جھوٹ بولتا ہے اسے اس کا حساب دینا ہوگا اور مشال یوسفزئی سے 8 فروری کے بعد بازپرس کی جائے گی۔

واضح رہے کہ چند روز قبل ایک نجی نیوز چینل کے پروگرام میں شریک مشال یوسفزئی نے انکشاف کیا تھا کہ بانی پی ٹی آئی عمران خان کی فیملی کی جانب سے سلمان اکرم راجا کو رات تقریباً دو بجے پیغام دیا گیا تھا کہ اڈیالہ جیل کے باہر جاری دھرنا ختم کر دیا جائے، جب کہ پارلیمنٹیرینز دھرنا ختم کرنے کے حق میں نہیں تھے۔

مشال یوسفزئی کے مطابق تمام پارلیمنٹیرینز نے دھرنا ختم کرنے کی مخالفت کی تھی، تاہم سلمان اکرم راجا نے مؤقف اختیار کیا کہ انہیں فیصلہ کرنے کا اختیار حاصل ہے، جس کے بعد انہوں نے دھرنا ختم کرنے کا اعلان کیا اور تمام شرکا واپس چلے گئے۔