نائب وزیر اعظم و وزیر خارجہ محمد اسحاق ڈار نے ناروے کے نائب وزیر خارجہ آندریاس موٹزفیلٹ کراوچ سےاسلام آباد میں اہم ملاقات کی، جس میں باہمی تعلقات، خطے کی بدلتی ہوئی صورتحال اور عالمی سطح پر درپیش چیلنجز پر تبادلہ خیال کیا گیا۔
دفتر خارجہ کے مطابق ملاقات کے دوران محمد اسحاق ڈار نے خطے میں کشیدگی کے خاتمے اور پائیدار امن کے قیام کے لیے پاکستان کی سفارتی کوششوں کو اجاگر کیا۔ انہوں نے کہا کہ پاکستان ہمیشہ مکالمے، تعاون اور تعمیری روابط کے ذریعے مسائل کے حل کا حامی رہا ہے اور مستقبل میں بھی یہی پالیسی جاری رکھی جائے گی۔
اس موقع پر آندریاس موٹزفیلٹ کراوچ نے پاکستان کے مثبت کردار کو سراہتے ہوئے کہا کہ ناروے خطے میں امن و استحکام کے لیے پاکستان کی کوششوں کی حمایت جاری رکھے گا۔ انہوں نے اس بات پر زور دیا کہ تنازعات کا پُرامن حل ہی دیرپا استحکام کی ضمانت فراہم کر سکتا ہے۔
ملاقات میں دونوں ممالک کے درمیان دوطرفہ تعلقات کو مزید وسعت دینے پر بھی اتفاق کیا گیا، جبکہ تجارت، سرمایہ کاری، تعلیم اور موسمیاتی تبدیلی سمیت مختلف شعبوں میں تعاون بڑھانے کے امکانات کا جائزہ لیا گیا۔ حکام کے مطابق پاکستان اور ناروے کے درمیان روابط میں اضافہ دونوں ممالک کے لیے سودمند ثابت ہو سکتا ہے۔
مزید پڑھیں: معرکۂ حق قومی اتحاد اور دفاعی قوت کی روشن مثال ہے، بلاول بھٹو زرداری
دوران ملاقات آندریاس موٹزفیلٹ کراوچ نے ناروے کے وزیر خارجہ کی جانب سے محمد اسحاق ڈار کو آئندہ ماہ منعقد ہونے والے اوسلو فورم میں شرکت کی دعوت دی، جسے پاکستانی وزیر خارجہ نے خوش آئند قرار دیتے ہوئے قبول کر لیا۔
واضح رہے کہ یہ پیش رفت اس بات کا اشارہ ہے کہ پاکستان عالمی سطح پر اپنے مثبت اور متوازن کردار کو مزید مؤثر انداز میں آگے بڑھا رہا ہے، جبکہ یورپی ممالک کے ساتھ تعلقات میں بھی بہتری آ رہی ہے،ایسے روابط نہ صرف علاقائی امن کے لیے اہم ہیں بلکہ اقتصادی اور سفارتی تعاون کے نئے دروازے بھی کھولتے ہیں۔
