پی سی بی کی جانب سے جاری کیے گئے بیان کے مطابق، پاکستان، سری لنکا اور زمبابوے کے درمیان یہ سیریز 17 نومبر سے 29 نومبر تک پنڈی کرکٹ اسٹیڈیم اور قذافی اسٹیڈیم لاہور میں کھیلی جائے گی۔

بیان میں کہا گیا ہے کہ قذافی اسٹیڈیم لاہور ایونٹ کے پانچ میچز کی میزبانی کرے گا جب کہ ہر ٹیم دوسری ٹیم کے خلاف دو، دو میچز کھیلے گی۔

سیریز کا آغاز 17 نومبر کو پاکستان اور زمبابوے کے درمیان پنڈی کرکٹ اسٹیڈیم میں ہونے والے افتتاحی میچ سے ہوگا، جب کہ 19 نومبر کو اسی میدان میں سری لنکا اور زمبابوے کی ٹیمیں آمنے سامنے ہوں گی۔

دونوں ٹیموں کے دوسرے میچز لاہور میں ہوں گے۔ 22 نومبر کو پاکستان اور سری لنکا کے درمیان پہلا میچ قذافی اسٹیڈیم میں کھیلا جائے گا، جب کہ 23 نومبر کو پاکستان اور زمبابوے دوبارہ مدمقابل ہوں گے۔

25 نومبر کو سری لنکا اور زمبابوے کے درمیان دوسرا میچ شیڈول ہے، جب کہ سیریز کا آخری لیگ میچ 27 نومبر کو پاکستان اور سری لنکا کے درمیان ہوگا۔

تین ملکی سیریز کا فائنل 29 نومبر کو لاہور کے قذافی اسٹیڈیم میں کھیلا جائے گا۔

واضح رہے کہ افغان کرکٹ بورڈ نے گزشتہ روز ایک بیان میں کشیدہ صورتِ حال کے باعث پاکستان میں شیڈول اس سیریز سے دستبرداری کا اعلان کیا تھا، جس کے بعد پی سی بی نے فوری طور پر زمبابوے کو شرکت کی دعوت دی جو قبول کر لی گئی۔