بشکیک میں کھیلے گئے مقابلے میں پاکستان کی انڈر 17 فٹبال ٹیم نے شاندار کھیل پیش کرتے ہوئے گوام کو گیارہ کے مقابلے صفر گول سے مات دے دی۔

میچ کے پہلے ہاف کے اختتام تک پاکستان کو چار صفر  کی برتری حاصل تھی، جب کہ دوسرے ہاف میں قومی ٹیم نے مزید سات  گول اسکور کرکے اپنی برتری کو ناقابلِ یقین بنا دیا۔

پاکستان کی جانب سے عبدالصمد نے چار گول اسکور کیے، کلیم اللہ جونیئر نے ہیٹرک بنائی، جب کہ عبداللہ، شہرام، حسنین اور شرف نے ایک ایک گول کرکے ٹیم کے اسکور میں حصہ ڈالا۔

واضح رہے کہ یہ کسی بھی انٹرنیشنل ایونٹ میں پاکستان کی انڈر 17 فٹبال ٹیم کی سب سے بڑی کامیابی ہے۔

گروپ اسٹیج میں پاکستان نے مجموعی طور پر پانچ میچ کھیلے ہیں، جن میں سے تین  میں کامیابی حاصل کی، جب کہ دو میچوں میں شکست کا سامنا کرنا پڑا۔