سری لنکا سے تعلق رکھنے والے تجربہ کار میچ ریفری گریم لا بروئے تینوں میچز میں میچ ریفری کے فرائض انجام دیں گے جبکہ آئی سی سی ایلیٹ پینل کے نامور امپائرز احسن رضا، رچرڈ کیٹلبرو اور کمار دھرماسینا آن فیلڈ امپائرنگ کے فرائض سرانجام دیں گے۔
پہلا ون ڈے انٹرنیشنل میچ 30 مئی کو راولپنڈی میں کھیلا جائے گا جہاں کمار دھرماسینا کے ساتھ آصف یعقوب آن فیلڈ امپائر ہوں گے۔ آصف یعقوب آئی سی سی ایمرجنگ امپائرز پینل سے وابستہ ہیں اور انہیں اہم میچ میں ذمہ داری دی گئی ہے۔
دوسرا ون ڈے 2 جون کو لاہور کے تاریخی قذافی اسٹیڈیم میں ہوگا جس میں فیصل خان آفریدی اور رچرڈ کیٹلبرو آن فیلڈ امپائرنگ کے فرائض انجام دیں گے، فیصل خان آفریدی آئی سی سی انٹرنیشنل امپائرز پینل کا حصہ ہیں اور انہیں ایک اور اہم بین الاقوامی میچ میں ذمہ داری دی گئی ہے۔
تیسرے اور آخری ون ڈے میچ میں جو 4 جون کو لاہور میں کھیلا جائے گا، احسن رضا اور کمار دھرماسینا آن فیلڈ امپائر ہوں گے جبکہ تجربہ کار ناصر حسین کو فورتھ امپائر مقرر کیا گیا ہے۔
کرکٹ ذرائع کے مطابق پاکستان اور آسٹریلیا کے درمیان یہ سیریز نہ صرف کھیل کے اعتبار سے اہمیت رکھتی ہے بلکہ دونوں ٹیموں کے درمیان عالمی کرکٹ میں مضبوط مقابلے کی روایت کو بھی آگے بڑھائے گی۔ آسٹریلوی ٹیم کے دورہ پاکستان کے لیے سیکیورٹی اور انتظامی تیاریاں بھی مکمل کر لی گئی ہیں۔
دوسری جانب شائقین کرکٹ میں سیریز کے آغاز سے قبل ہی جوش و خروش بڑھ گیا ہے اور یہ سیریز نوجوان کھلاڑیوں کے لیے بھی ایک بہترین موقع ثابت ہوگی۔
واضح رہے کہ آسٹریلیا کی ٹیم نے اس سیریز کے لیے اپنا اسکواڈ پہلے ہی اعلان کر دیا ہے اور توقع کی جا رہی ہے کہ دونوں ٹیموں کے درمیان سخت اور دلچسپ مقابلے دیکھنے کو ملیں گے۔
