لندن میں کھیلے گئے میچ کے پہلے کوارٹر میں پاکستان نے عمدہ کھیل پیش کیا اور آٹھویں منٹ میں ندیم احمد نے پنالٹی کارنر پر گول کرکے ٹیم کو برتری دلائی۔

اس کے بعد انڈیا نے مسلسل چار پنالٹی کارنرز حاصل کیے، تاہم پاکستانی گول کیپر علی رضا نے شاندار کارکردگی کا مظاہرہ کرتے ہوئے تمام حملے ناکام بنا دیے۔ پہلا کوارٹر پاکستان کی ایک صفر کی برتری پر اختتام پذیر ہوا۔

دوسرے کوارٹر میں انڈیا کے ابشیک نے گول کرکے مقابلہ برابر کر دیا، جب کہ کچھ ہی دیر بعد انڈین ٹیم نے دوسرا گول بھی کر کے برتری حاصل کر لی۔

تیسرے کوارٹر میں سرجیت سنگھ نے انڈیا کے لیے تیسرا گول اسکور کیا، جب کہ چوتھے کوارٹر میں رجندر سنگھ نے ایک اور گول کرکے اسکور 1-4 کر دیا۔

میچ کے آخری لمحات میں پاکستان نے بھرپور واپسی کی کوشش کی۔ کپتان ابوبکر نے دوسرا گول اسکور کرکے خسارہ کم کیا، جب کہ کھیل ختم ہونے سے صرف 10 سیکنڈ قبل شکیل نے پاکستان کے لیے تیسرا گول کر دیا، تاہم گرین شرٹس شکست سے نہ بچ سکیں۔

میچ میں انڈیا کو 11، جب کہ پاکستان کو 8 پنالٹی کارنرز حاصل ہوئے۔

اس شکست کے ساتھ پاکستان کی ایف آئی ایچ پرو ہاکی لیگ میں مسلسل 13ویں ناکامی ریکارڈ ہوئی، جب کہ قومی ٹیم اگلے سیزن کی پرو لیگ میں جگہ بنانے میں بھی ناکام رہی۔