تفصیلات کے مطابق ملائیشیا کے شہر سراواک میں جاری تیسری ایشین ڈبل اسکواش چیمپئن شپ کے سیمی فائنل میں عالمی انڈر 23 چیمپئن نور زمان اور سابق قومی چیمپئن ناصر اقبال پر مشتمل پاکستانی جوڑی نے میزبان ملائیشیا کو 25 منٹ کے مقابلے کے بعد 0-2 سے شکست دی۔

پاکستانی جوڑی نے ہمیشن راج چندرن اور جوا چم چوہا پر مشتمل ملائیشین ٹیم کے خلاف پہلا گیم 8-11 سے جیتا، جب کہ دوسرے گیم میں بھی 5-11 سے کامیابی حاصل کرتے ہوئے فائنل کے لیے کوالیفائی کر لیا۔

واضح رہے کہ پاکستان نے گزشتہ برس ایشین ڈبل اسکواش چیمپئن شپ میں سلور میڈل اپنے نام کیا تھا، جب کہ اب قومی ٹیم کی نظریں ٹائٹل جیتنے پر مرکوز ہیں۔

دوسری جانب سابق عالمی جونیئر چیمپئن محمد حمزہ خان اور انٹرنیشنل کھلاڑی محمد عاصم خان پر مشتمل پاکستان ٹیم ٹو نے سنگاپور کو صرف 13 منٹ کے مقابلے کے بعد 0-2 سے شکست دے کر چیمپئن شپ میں پانچویں پوزیشن حاصل کر لی۔

پاکستان اسکواش فیڈریشن کے اعزازی سیکریٹری ایئر کموڈور (ر) عامر نواز ٹیم مینیجر جبکہ سابق عالمی کھلاڑی فہیم گل کوچ کی ذمہ داریاں انجام دے رہے ہیں۔