بحرین میں جاری گیمز کے والی بال فائنل میں ایران کی مضبوط ٹیم نے شاندار کارکردگی کا مظاہرہ کرتے ہوئے پاکستان کو اسٹریٹ سیٹس میں مات دی۔

ٹورنامنٹ میں ناقابلِ شکست رہنے والی پاکستانی ٹیم ایران کے خلاف عمدہ کھیل پیش کرنے کے باوجود کامیابی حاصل نہ کر سکی۔

ایران نے پہلا سیٹ 21-25 سے جیتنے کے بعد دوسرے سیٹ میں سخت جدوجہد کے بعد 23-25 سے کامیابی حاصل کی، جب کہ تیسرا سیٹ بھی اسی اسکور سے جیت کر ٹائٹل اپنے نام کر لیا۔

سیمی فائنل میں پاکستان نے انڈونیشیا کو تین -ایک سے شکست دی تھی، جب کہ ایران نے تھائی لینڈ کو تین -صفر سے ہرا کر فائنل میں رسائی حاصل کی تھی۔

پاکستان نے اس سے قبل کبڈی میں برانز میڈل جیتا تھا۔ ایک سلور اور ایک برانز میڈل کے ساتھ پاکستان پوائنٹس ٹیبل پر 35 ویں سے 29 ویں پوزیشن پر آ گیا ہے۔

31 اکتوبر تک جاری رہنے والے گیمز میں چین 106 میڈلز کے ساتھ سرفہرست ہے، جن میں 50 گولڈ، 38 سلور اور 18 برانز میڈلز شامل ہیں۔

ازبکستان دوسرےاور  قازقستان تیسرے نمبر پر ہے، جب کہ انڈیاچھٹی پوزیشن سے 11ویں نمبر پر چلا گیا ہے۔