پی ایس ایل کے لندن روڈ شو کے دوران چیئرمین پی سی بی محسن نقوی نے اعلان کیا کہ مظفرآباد کرکٹ اسٹیڈیم کو پی ایس ایل میچز کے لیے بین الاقوامی معیار کے مطابق تیار کیا جا رہا ہے۔

محسن نقوی کے مطابق شہر میں غیر ملکی کھلاڑیوں کی میزبانی کے لیے فائیو اسٹار ہوٹل کی سہولت بھی موجود ہے، جو ایونٹ کے انعقاد کو مزید سہل بنائے گی۔

انہوں نے بتایا کہ پی سی بی نہ صرف پی ایس ایل بلکہ مستقبل میں بین الاقوامی میچز بھی آزاد کشمیر میں کرانے کی خواہش رکھتا ہے۔

پی سی بی حکام کے مطابق اسٹیڈیم کی اپ گریڈیشن اور انفراسٹرکچر سے متعلق کام جلد شروع ہوگا، جس کے مکمل ہونے کے بعد شیڈول اور میچز کی تاریخوں کا باضابطہ اعلان کیا جائے گا۔

یہ اعلان آزاد کشمیر میں کھیلوں کے فروغ کی جانب اہم پیش رفت قرار دیا جا رہا ہے، جس سے علاقے میں ٹورزم، معاشی سرگرمیوں اور بین الاقوامی کرکٹ کے امکانات میں اضافہ ہوگا۔