ذرائع کے مطابق چیئرمین پی سی بی نے بھارت کے خلاف فائنل میں شاندار کامیابی حاصل کرنے والی فاتح ٹیم کے ہر کھلاڑی کو 50، 50 لاکھ روپے دینے کا اعلان کیا ہے۔

ذرائع کا کہنا ہے کہ فائنل میں تاریخی فتح کے بعد محسن نقوی نے کھلاڑیوں سے ملاقات کی، ان کی بھرپور حوصلہ افزائی کی اور شاندار کھیل پر ٹیم کی تعریف کی۔ انہوں نے کھلاڑیوں کو یقین دہانی کرائی کہ پی سی بی ان کا ہر طرح سے خیال رکھے گا۔

محسن نقوی نے اس موقع پر کھلاڑیوں کو یہ بھی باور کرایا کہ ان کی میڈیکل سہولیات سمیت تمام ضروریات پوری کی جائیں گی تاکہ وہ مستقبل میں بھی بہترین کارکردگی کا مظاہرہ کر سکیں۔

واضح رہے کہ دبئی میں کھیلے گئے ایشین کرکٹ کونسل (اے سی سی) انڈر 19 ایشیا کپ کے فائنل میں پاکستان نے سمیر منہاس کی شاندار بیٹنگ کی بدولت روایتی حریف انڈیا کو 191 رنز کے بھاری مارجن سے شکست دے کر ٹائٹل اپنے نام کیا تھا۔