نیشنل اسٹیڈیم کراچی میں سجائی گئی اس پُروقار تقریب میں اولمپک گولڈ میڈلسٹ ارشد ندیم نے اولمپیئن اصلاح الدین اور دیگر کھلاڑیوں کے ہمراہ قومی کھیلوں کی مشعل روشن کی، جس سے ایونٹ کا باضابطہ آغاز ہوا۔

رپورٹ کے مطابق افتتاحی تقریب میں ملک بھر سے آئے ہزاروں ایتھلیٹس، آفیشلز، کھیلوں سے وابستہ شخصیات، سیاسی و سماجی رہنماؤں نے بھرپور شرکت کی اور ایک شاندار میگا اسپورٹس فیسٹیول کا منظر پیش کیا۔

تقریب سے خطاب کرتے ہوئے بلاول بھٹو زرداری نے کہا کہ میرے سامنے بیٹھے یہ نوجوان مستقبل میں ملک کے لیے میڈلز جیتیں گے۔ امید ہے کہ ہم سب مل کر نیشنل گیمز کو کامیاب بنائیں گے۔

انہوں نے نوجوانوں کو کھیلوں میں بھرپور حصہ لینے کی تلقین کرتے ہوئے کہا کہ 18 سال بعد کراچی میں نیشنل گیمز کا انعقاد فخر کی بات ہے۔

اس موقع پر وزیراعلیٰ سندھ سید مراد علی شاہ نے بھی تقریب سے خطاب کیا۔ انہوں نے بتایا کہ کراچی کے 24 مختلف مقامات پر 32 کھیلوں کے مقابلے منعقد ہو رہے ہیں جہاں پاکستان کے تمام صوبوں اور علاقوں کی ثقافت، توانائی اور خوبصورتی جھلک رہی ہے۔

مراد علی شاہ نے ملک بھر سے آنے والے کھلاڑیوں کو خوش آمدید کہتے ہوئے کہا کہ آپ سب نے یہاں تک پہنچنے کے لیے بے پناہ محنت اور جدوجہد کی ہے۔ یہ صرف سندھ حکومت نہیں بلکہ پورے صوبے کے عوام کے لیے باعثِ فخر موقع ہے۔

انہوں نے مزید کہا کہ دو دہائیوں کے طویل وقفے کے بعد نیشنل گیمز کا کراچی میں انعقاد تاریخی لمحہ ہے۔ ہم 35ویں نیشنل گیمز کو ایک یادگار ایونٹ بنا دیں گے۔

واضح رہے کہ نیشنل گیمز میں پاکستان آرمی کی ٹیم اپنی ٹرافی اور اعزاز کا دفاع کرے گی۔نیشنل گیمز میں پاکستان آرمی،واپڈا،ہائر ایجوکیشن کمیشن،پاکستان نیوی،پاکستان ائر فورس،پاکستان پولیس اور پاکستان ریلوے، جب کہ چاروں صوبوں کے علاوہ گلگت بلتستان،آزاد جموں کشمیر اور اسلام آباد کے کھلاڑی بھی شرکت کر رہے ہیں۔

نیشنل گیمز کے لئے بانی پاکستان قائد اعظم محمد علی جناح کی جانب سے دی گئی جنرل ٹرافی کے حصول کے لئے سات محکموں سمیت چاروں صوبوں،وقافی دارالحکومت،آزاد جموں کشمیر اور گلگت بلتستان کے کھلاڑی میدان میں اتریں گے۔

یاد رہے کہ کوئٹہ میں 2023میں منعقدہ34ویں نیشنل گیمز کی اختتامی تقریب میں سندھ کو 35ویں نیشنل گیمز الاٹ کئے گئے تھے۔

پاکستان اسپورٹس بورڈ اور پاکستان اولمپک ایسوسی ایشن کی مشترکہ کاوشوں سی1948سے لے کر2023تک مجموعی طور پر 34نیشنل گیمز منعقد کئے جا چکے ہیں۔

 پاکستان آرمی کو سب سے زیادہ 28بار نیشنل گیمز جیتنے کا اعزاز حاصل ہے۔ اب تک نیشنل گیمز لاہور میں دس بار،کراچی اور پشاور میں سات سات بار،ڈھاکہ میں چار بار،کوئٹہ میں چار بار،فیصل آباد اور ساہی وال میں ایک ایک بار منعقد کئے جا چکے ہیں۔