شاداب خان کندھے کی سرجری کے بعد دوبارہ ایکشن میں آئے ہیں اور ان دنوں بیگ بیش لیگ میں اپنے کمالات دکھا رہے ہیں۔ انہیں مکمل فٹنس رپورٹ کے بعد ٹی ٹوئنٹی اسکواڈ میں شامل کیا گیا۔

ان کے ساتھ وکٹ کیپر بیٹر خواجہ نافع کو پہلی بار ٹی ٹوئنٹی ٹیم کا حصہ بنایا گیا ہے، جب کہ ٹیم کی قیادت آل راؤنڈر سلمان علی آغا کریں گے۔

شاداب خان کی اسکواڈ میں واپسی پر سابق کپتان راشد لطیف نے سماجی رابطے کی سائٹ ایکسپر سوال اٹھایا اور لکھا کہ سری لنکا کے ساتھ سیریز کے لیے پاکستان کے ٹی ٹوئنٹی اسکواڈ میں شاداب خان تو شامل کر لیا گیا لیکن ڈومیسٹک میں بہترین کارکردگی دکھانے والے سفیان مقیم اور معاذ صداقت کو نظر انداز کر دیا گیا۔

شاداب کی واپسی کے بعد سوشل میڈیا پر ان کا نام ٹاپ ٹرینڈ کرتا رہا، جب کہ ان کی شمولیت کے فیصلے پر کرکٹ حلقوں میں بھی گفتگو جاری ہے۔

واضح رہے کہ پاکستان اور سری لنکا کے درمیان تین ٹی ٹوئنٹی انٹرنیشنل میچز سات جنوری، نو جنوری اور 11 جنوری کو کھیلے جائیں گے۔