اس سیزن میں پاکستان بہترین ردھم کے ساتھ میدان میں اترے گا۔ قومی ٹیم متحدہ عرب امارات میں تین ملکی ٹی ٹوئنٹی سیریز جیت چکی ہے، جنوبی افریقہ کے خلاف دو طرفہ ٹی ٹوئنٹی سیریز اپنے نام کی ہے، جب کہ ایشیا کپ کا فائنل بھی کھیلا ہے۔

ٹی ٹوئنٹی ٹیم کے کپتان سلمان علی آغا کا کہنا ہے کہ یہ سہ ملکی سیریز پاکستانی ٹیم کے لیے انتہائی موزوں وقت پر آ رہی ہے، کیونکہ دو مضبوط ٹیموں کے خلاف مسلسل کرکٹ سے آئندہ سال ہونے والے آئی سی سی مینز ٹی ٹوئنٹی ورلڈ کپ کی تیاریوں کو مزید تقویت ملے گی۔

انہوں نے کہا کہ ٹیم نے گزشتہ چند ماہ میں شاندار کارکردگی دکھائی ہے۔ شارجہ میں سہ فریقی سیریز جیتی، ایشیا کپ کے فائنل تک رسائی حاصل کی، جب کہ جنوبی افریقا اور سری لنکا کے خلاف وائٹ بال کرکٹ میں کامیابیاں حاصل کیں۔

سلمان علی آغا نے امید ظاہر کی کہ راولپنڈی کے شائقین جس جوش و خروش کے ساتھ ہوم ٹیم کی حوصلہ افزائی کرتے ہیں، وہ اس سیریز میں بھی دیکھنے کو ملے گا اور شاندار مقابلے ہوں گے۔

اعداد و شمار کے مطابق پاکستان اور زمبابوے کے درمیان اب تک 21 ٹی ٹوئنٹی انٹرنیشنل کھیلے جا چکے ہیں جن میں سے 18 پاکستان نے جیتے اور 3 زمبابوے کے نام رہے۔ پاکستان اور سری لنکا کے درمیان 24 ٹی ٹوئنٹی انٹرنیشنل مقابلے ہوئے، جن میں پاکستان نے 14 اور سری لنکا نے 10 میں کامیابی حاصل کی۔