شکیب الحسن نے اپنے آفیشل سوشل میڈیا اکاؤنٹس پر ایک دل کو چھو لینے والا پیغام شیئر کیا، جس میں انہوں نے مشفق کے ساتھ اپنے ابتدائی دور کی یادیں تازہ کیں۔
انہوں نے لکھا کہ انہیں آج بھی یاد ہے جب مشفق نے لارڈز میں اپنا پہلا ٹیسٹ کھیلا تھا اور وہ بی کے ایس پی کے تفریحی کمرے میں بیٹھ کر ہر گیند دیکھتے رہے تھے۔
شکیب نے لکھا کہ اس دن سے آپ نے مجھے اور بنگلہ دیش سمیت دنیا بھر کے نوجوان کرکٹرز کو متاثر کیا۔ جب سے آپ عمر کی سطح کی ٹیم کی قیادت کر رہے تھے، میں نے آپ کو اپنا کپتان مانا تھا اور آج بھی آپ میرے کپتان ہیں۔
شکیب نے اس تاریخی موقع پر اپنے ساتھی کو بھرپور مبارکباد پیش کرتے ہوئے کہا کہ جس طرح انہوں نے مشفق کا پہلا ٹیسٹ دیکھا تھا، اسی طرح وہ ان کے 100ویں ٹیسٹ کی ہر گیند بھی دیکھیں گے۔ انہوں نے امید ظاہر کی کہ مشفق اس یادگار میچ سے لطف اندوز ہوں گے اور بہترین کارکردگی کا مظاہرہ کریں گے۔
انہوں نے مزید لکھا کہ مشفق بھائی، 100 واں ٹیسٹ کسی بھی کرکٹر کے لیے عظیم اعزاز ہے۔ کاش میں یہ میچ بھی آپ کے ساتھ کھیل رہا ہوتا اور میدان میں آپ کی اس کامیابی کا جشن مناتا۔
واضح رہے کہ شکیب الحسن نے 2024 میں ٹیسٹ کرکٹ سے ریٹائرمنٹ لے لی تھی اور وہ ٹی ٹوئنٹی انٹرنیشنل سے بھی دستبردار ہو چکے ہیں۔ تاہم 38 سالہ آل راؤنڈر اب بھی دنیا بھر کی مختلف لیگز میں اپنی صلاحیتوں کے جوہر دکھا رہے ہیں۔
مشفق الرحیم کی 100 ٹیسٹ میچوں کی تکمیل نہ صرف ان کے کیریئر کا اہم سنگِ میل ہے بلکہ بنگلہ دیش کرکٹ کی تاریخ کا بھی ایک سنہرا لمحہ قرار دیا جا رہا ہے۔
