یہ اسکالرشپ پروگرام بین الاقوامی طلبا کو اٹلی میں معیاری تعلیم کے مواقع فراہم کرنے کے لیے ترتیب دیا گیا ہے، جس کا مقصد تعلیمی تعاون کو فروغ دینا اور مختلف ممالک کے طلبا کو جدید تعلیمی نظام سے روشناس کروانا ہے۔
ایم اے ای سی آئی اسکالرشپ کے تحت منتخب طلبا کو ہر ماہ 900 یورو وظیفہ فراہم کیا جائے گا، جس سے رہائش، خوراک اور دیگر بنیادی اخراجات پورے کیے جا سکیں گے۔ اس کے علاوہ ٹیوشن فیس اور داخلہ فیس سے مکمل استثنا بھی دیا جائے گا۔
اسکالرشپ میں ہیلتھ اور ایکسیڈنٹ انشورنس شامل ہے، جو دورانِ تعلیم طلبا کو طبی تحفظ فراہم کرے گی۔
یہ اسکالرشپس عام طور پر 3، 6 یا 9 ماہ کے لیے دی جاتی ہیں، تاہم ماسٹرز اور پی ایچ ڈی جیسے طویل المدتی پروگرامز میں داخلہ لینے والے طلبا کارکردگی کی بنیاد پر توسیع کے لیے درخواست دے سکتے ہیں۔
یہ اسکالرشپس ماسٹرز، پی ایچ ڈی اور تحقیقی پروگرامز کے لیے دستیاب ہیں، اور ہر پروگرام کے لیے اہلیت کی شرائط الگ مقرر کی گئی ہیں۔
ماسٹرز پروگرام کے لیے امیدوار کی عمر 28 سال سے کم اور متعلقہ شعبے میں بیچلر ڈگری ہونا ضروری ہے۔
پی ایچ ڈی پروگرام کے لیے عمر کی حد 30 سال ہے اور امیدوار کے پاس ماسٹرز ڈگری کے ساتھ داخلہ یا پری ایکسیپٹنس لیٹر ہونا لازمی ہے۔
تحقیقی پروگرامز کے لیے امیدوار کی زیادہ سے زیادہ عمر 40 سال تک مقرر کی گئی ہے۔
تمام درخواستیں Study in Italy کے سرکاری آن لائن پورٹل کے ذریعے جمع کروائی جائیں گی، جہاں امیدوار کو اکاؤنٹ بنا کر متعلقہ پروگرام منتخب کرنا اور مطلوبہ دستاویزات اپ لوڈ کرنا ہوں گی۔
درکار دستاویزات میں پاسپورٹ کی کاپی، سی وی، تعلیمی اسناد، موٹیویشن لیٹر، زبان کی مہارت کا سرٹیفکیٹ، اور متعلقہ پروگرام کے لیے داخلہ یا تحقیقی منصوبہ شامل ہیں۔
اسکالرشپ کے لیے درخواست جمع کروانے کی متوقع آخری تاریخ جون 2026 کے وسط تک ہے۔
تعلیمی ماہرین کے مطابق یہ اسکالرشپ پاکستانی طلبا کے لیے ایک سنہری موقع ہے، جو انہیں بین الاقوامی سطح پر آگے بڑھنے اور ملک کی نمائندگی کا موقع فراہم کرتا ہے۔
