انڈین میڈیا کے مطابق مودی نے راجیہ سبھا میں اپوزیشن کی نعرے بازی کے دوران کہا کہ 2002 سے اب تک ایک لمحہ بھی ایسا نہیں گزرا جب ان لوگوں نے مجھے گالی دینے سے گریز کیا ہو۔ کسی نے مجھ سے پوچھا کہ صحت کا راز کیا ہے، میں نے جواب دیا، میں روزانہ دو کلو گالیاں کھاتا ہوں۔

اپوزیشن کے نعروں پر ردعمل دیتے ہوئے نریندر مودی نے کہا کہ لوگ کہتے ہیں، مودی تیری قبر کھودے گی اور یہ محض ایک نعرہ نہیں بلکہ ان کی میرے خلاف بدترین نفرت کا اظہار ہے۔

مودی نے کانگریس کی ماضی کی حکومتوں پر بھی تنقید کی اور کہا کہ گزشتہ ایک دہائی میں وہ ماضی کی غلطیوں کو درست کرنے کی کوشش کر رہے ہیں۔

انڈین وزیراعظم نے مزید کہا کہ کانگریس عوامی مسائل کو سنجیدگی سے نہیں لیتی۔ اس حوالے سے انہوں نے اندرا گاندھی کی ایک مثال بھی دی کہ ایران کے دورے کے دوران اندرا گاندھی نے اپنے والد پنڈت نہرو سے پوچھا تھا کہ ان کو کتنے مسائل کا سامنا ہے، جس پر نہرو جی نے جواب دیا35 کروڑ اور اس وقت انڈیا کی کل آبادی بھی تقریباً 35 کروڑ تھی۔