انڈین وزارتِ خارجہ کے ترجمان رندھیر جیسوال نے سماجی رابطے کی سائٹ ایکس پر انڈین وزارت خارجہ کے بیان کو شئیر  کیا جس میں لکھا تھا  کہ پاکستان کی جانب سے انڈیا پر لگائے گئے دہشت گردی سے متعلق الزامات حقائق کے برعکس اور سیاسی مقاصد پر مبنی ہیں۔

رندھیر جیسوال نے کہا کہ یہ پاکستان کی ایک پرانی حکمتِ عملی ہے جس کے ذریعے وہ اپنے عوام کی توجہ اندرونی مسائل، بالخصوص فوج سے متاثرہ آئینی ترمیم اور اقتدار کی سیاست سے ہٹانا چاہتا ہے۔

ترجمان کے مطابق بین الاقوامی برادری حقیقت سے بخوبی واقف ہے اور وہ پاکستان کی مایوس کن کوششوں سے گمراہ نہیں ہوگی۔

واضح رہے کہ اسلام آباد کے علاقے جی 10 کچہری میں خودکش دھماکے کے بعد وزیرِ اعظم شہباز شریف نے الزام عائد کیا تھا کہ اس حملے میں انڈیا کی پشت پناہی میں سرگرم گروہ ملوث ہیں۔

تاحال اس حملے کی ذمہ داری کے حوالے سے متضاد اطلاعات سامنے آئی ہیں۔ مقامی میڈیا کے مطابق کالعدم تنظیم جماعت الاحرار نے واقعے کی ذمہ داری قبول کی ہے.

تاہم ذرائع کا کہنا ہے کہ تحریک طالبان پاکستان (ٹی ٹی پی) کی مرکزی قیادت نے اس دھماکے سے لاتعلقی ظاہر کی ہے۔