تفصیلات کے مطابق سعودی دارالحکومت ریاض میں منعقد ہونے والی عالمی دفاعی نمائش میں 80 ممالک کی مختلف کمپنیوں نے شرکت کی ہے اور مجموعی طور پر 900 سے زائد اسٹالز لگائے گئے ہیں۔

پاکستان کی جانب سے گلوبل انڈسٹریل اینڈ ڈیفنس سلوشنز، ہیوی انڈسٹریز ٹیکسلا، پاکستان آرڈنینس فیکٹریز، نیشنل ریڈیو اینڈ ٹیلی کمیونیکیشن کارپوریشن سمیت دیگر ادارے نمائش میں اپنے اسٹالز کے ذریعے شرکت کر رہے ہیں۔

نمائش میں معرکۂ حق ’بنیانِ مرصوص‘ کے دوران پاکستان کی دفاعی لائن کو مضبوط بنانے والے میزائل فتح ٹو سمیت دیگر جدید میزائل سسٹمز نمائش کے لیے پیش کیے گئے ہیں۔ اس کے علاوہ پاکستانی ڈرون ٹیکنالوجی اور جدید دفاعی سازوسامان بھی نمائش کا حصہ ہیں، جنہیں شرکاء کی جانب سے بے حد سراہا جا رہا ہے۔

گلوبل انڈسٹریل اینڈ ڈیفنس سلوشنز کے چیف ایگزیکٹو آفیسر اسد کمال کا کہنا ہے کہ سعودی عرب میں عالمی دفاعی نمائش کے انعقاد سے مشرقِ وسطیٰ اور دیگر ممالک کے سامنے پاکستانی دفاعی صنعت کو مؤثر انداز میں پیش کرنے کا موقع ملتا ہے۔

ان کا مزید کہنا تھا کہ معرکۂ حق کے بعد دنیا بھر میں پاکستانی دفاعی سازوسامان میں بھرپور دلچسپی دیکھی جا رہی ہے۔