اجلاس سے خطاب کرتے ہوئے وزیراعظم نے ہدایت کی کہ بجلی کی ترسیلی نظام کو بہتر بنا کر لائن لاسز میں نمایاں کمی لائی جائے۔ انہوں نے توانائی کے شعبے میں جدید ٹیکنالوجی کے استعمال کو فروغ دینے پر بھی زور دیا۔

وزیراعظم نے مزید ہدایت کی کہ ملک میں توانائی کی کمی کو پورا کرنے کے لیے قابلِ تجدید توانائی منصوبوں کو فروغ دیا جائے، جب کہ بجلی کے نرخوں کو مستحکم رکھنے کے لیے جامع حکمت عملی تیار کی جائے۔ صارفین کے لیے بلوں کی ادائیگی کو آسان بنانے کے لیے ڈیجیٹل سہولیات کی فراہمی پر بھی زور دیا گیا۔

اجلاس میں بجلی چوری کے خاتمے کے لیے سخت اقدامات جاری رکھنے اور صنعتی ترقی کے لیے بلا تعطل توانائی کی فراہمی یقینی بنانے کی ہدایات بھی دی گئیں۔

وزیراعظم نے کہا کہ گھریلو صارفین کو سہولیات فراہم کرنا حکومت کی اولین ترجیحات میں شامل ہے اور توانائی کے شعبے میں اصلاحات عوام اور صنعت کے وسیع تر مفاد کو مدنظر رکھ کر کی جائیں گی۔

اجلاس میں گھریلو اور صنعتی صارفین کے لیے بجلی کے استعمال سے متعلق مختلف سفارشات بھی وزیراعظم کو پیش کی گئیں۔

اجلاس میں نائب وزیراعظم و وزیر خارجہ اسحاق ڈار، وزیر خزانہ محمد اورنگزیب، وزیر اقتصادی امور احد خان چیمہ، وزیر اطلاعات عطاءاللہ تارڑ، وزیر توانائی سردار اویس احمد خان لگاری، وزیر پیٹرولیم علی پرویز ملک سمیت متعلقہ اداروں کے اعلیٰ حکام نے شرکت کی۔