گزشتہ روز سوشل میڈیا پر وائرل ہونے والی ویڈیوز میں دیکھا گیا کہ طلحہ انجم نے اسٹیج پر انڈین پرچم نہ صرف لہرایا بلکہ اسے کندھے پر بھی اوڑھ لیا۔ کنسرٹ میں موجود شرکا کے مطابق یہ اقدام مختلف ممالک سے آئے ہوئے سامعین کے احترام اور امن و دوستی کا پیغام دینے کی کوشش تھا۔

ویڈیوز سامنے آتے ہی سوشل میڈیا پر صارفین کے درمیان بحث چھڑ گئی۔ کچھ نے طلحہ انجم کے عمل کو فن کے ذریعے نفرت کم کرنے کی کوشش قرار دیا، جب کہ کئی صارفین نے اس پر ناراضی کا اظہار کیا۔

 ناقدین کا کہنا تھا کہ فن کی آزادی اپنی جگہ، مگر ایسے ملک کا پرچم لہرانا مناسب نہیں جو پاکستان کو عالمی سطح پر مسلسل منفی انداز میں پیش کرتا ہے۔ عزتِ نفس بھی اہم ہوتی ہے۔

تنقید کے جواب میں طلحہ انجم نے ایکس پر اپنے پیغام میں کہا کہ ان کے دل میں کسی قوم کے لیے نفرت نہیں، اور ان کا فن سرحدوں سے بالاتر ہے۔

 انہوں نے واضح کیا کہ اگر انڈین پرچم لہرانے سے تنازع پیدا ہوا ہے تو وہ اس عمل کو بغیر ہچکچاہٹ کے دوبارہ بھی دہرائیں گے۔

ان کا کہنا تھا کہ وہ میڈیا پروپیگنڈا یا حکومتوں کے جنگ جیسے بیانیوں کی پروا نہیں کرتے اور اردو ریپ ہمیشہ سرحدوں اور سیاست سے آزاد رہے گا۔

واضح رہے کہ مئی میں انڈیا اور پاکستان کے درمیان چار روزہ شدید فوجی جھڑپ کے بعد دونوں ممالک کے تعلقات تاحال کشیدہ ہیں اور انڈیا کی جانب سے اس واقعے کے بعد سے پاکستانی فنکاروں اور چینلز کا مکمل بائیکاٹ جاری ہے۔