سماجی رابطے کی ویب سائٹ ایکس (سابقہ ٹوئٹر) پر جاری اپنے بیان میں حافظ نعیم الرحمان نے کہا کہ عالمی مارکیٹ میں خام تیل کی قیمت 70 ڈالر فی بیرل سے بھی نیچے آ چکی ہے، اس لیے حکومت عوام کو فوری ریلیف فراہم کرے۔

انہوں نے کہا کہ آئل مارکیٹنگ کمپنیوں کو جواز بنا کر عوام کو پٹرولیم مصنوعات کی قیمتوں میں کمی کے ثمرات سے محروم نہ رکھا جائے۔ اگر معیشت کا پہیہ دوبارہ مؤثر انداز میں چلانا ہے تو پٹرول اور ڈیزل کی قیمتوں میں نمایاں کمی ناگزیر ہے۔

امیر جماعت اسلامی نے مطالبہ کیا کہ پٹرولیم لیوی ختم کی جائے اور عالمی منڈی میں قیمتوں میں ہونے والی کمی کا مکمل فائدہ عوام تک پہنچایا جائے۔

انہوں نے کہا کہ کرایوں اور اشیائے ضروریہ کی قیمتیں بھی جنگ سے پہلے کی سطح پر لائی جائیں، جب کہ مہنگے ایندھن کی وجہ سے معیشت کو پہنچنے والے نقصان کا فوری ازالہ کیا جائے۔

حافظ نعیم الرحمان نے اس بات پر زور دیا کہ عوام کو حقیقی ریلیف فراہم کرنا حکومت کی بنیادی ذمہ داری ہے۔